香港文壇總是埕埕塔塔，無他，錢作怪，因愛情作品最易入口，反觀紅極一時的武俠小說，金庸古龍黃易後無以為繼，幸窮途末路尚有個喬靖夫，作品《武道狂之詩》出到第二篇，葉偉信和九把刀讚不絕口，書中引用盧國沾一句詞：「雖知此山頭，猛虎滿佈，膽小非英雄，決不願停步！」彷彿向世界宣示他武者世界裏那份孤高的不落俗套。
記者：蒙為亮
攝影：林栢鈞
袁建滔
浸大傳理系畢業生，主修電影，1997年應《麥嘜》原作人謝立文之邀，4年後完成動畫《麥兜故事》，並奪法國安錫國際動畫電影節最佳電影獎，2004年完成《麥兜‧菠蘿油王子》，榮獲同年度香港電影評論學會最佳電影獎。
喬靖夫
城大翻譯系畢業生，1996年推出《幻國之刃》及《殺禪》，近作有《武道狂之詩》。他是兼職作詞人，作品包括盧巧音《深藍》、王菲《光之翼》及陳奕迅《早開的長途班》，2000年獲香港作曲家及作詞家協會最佳歌詞獎。
泡女不成 醉心武俠
找喬靖夫與袁建滔談武俠小說，一個是新進武俠小說作家，一個是卡通動畫導演，驟看風馬牛不相及，但原來他倆是相識20年的中學同學，中一開始已迷上漫畫小說，更因為就讀的是男校，沒女泡，運動又欠佳，惟有沉溺武俠世界，還試過為追看金庸小說，一個考尾二，一個考尾六，認真嗚呼哀哉。
喬靖夫=喬
袁建滔=袁
記者=記
喬：中一已經同袁建滔做朋友，無他，貪佢有部阿達利遊戲機，同佢Friend就可以上佢屋企打機，我記得呀，部遊戲機賣一千蚊，當年係1980年，大部份人都係得幾千蚊人工咋。
袁：咁貴都要買，諗番都覺得對阿媽唔住，好彩之後都無沉迷遊戲機，反而不知不覺間受你影響迷上日本漫畫。想當年特登去大丸、東急買日本漫畫睇，明知睇唔明都死睇，家呢兩間日本百貨公司都唔見晒，可惜。
喬：嗰時係集英社最強年代，《少年Jump》、《足球小將》……仲有我最鍾意嘅《北斗之拳》，記唔記得呢句經典對白呀：「你已經死了！」哈哈……
記：係唔係睇得日本格鬥漫畫多，搞到你哋鍾意埋武俠小說？
袁：又唔係喎，八十年代電視劇先最令我廢寢忘餐，當年電視劇同武俠片幾乎畫上等號，《神鵰俠侶》、《天龍八部》、《射鵰英雄傳》等等，晚晚準時電視撈飯。
喬：無錯，記唔記得中三嗰件事呀，當年電視播緊《神鵰俠侶》，我同你同幾個同學，為咗搶先知道劇情，大家懶醒鬥快睇原裝小說，就係咁中三嗰年，我全班考尾二，好羞家。
袁：我都唔好得你好多，考尾六，諗番都覺得低能。
喬：低能？未算！仲記唔記得你恃住有幾分畫公仔天份，學人改編《如來神掌》，用木顏色畫咗本《七彩如來神掌》，將于洋、龍劍飛呢啲角色改頭換面，主角未出手，對方已經全身經脈盡斷而死。
袁：嗰時細個吖嘛，邊理得咁多，自己改編得開心咪得囉，一般武俠小說都有犯駁位o架啦，點解主角一定係武俠奇才先？武俠庸才唔得o架？
喬：哈哈，有機會，我一定要試寫武俠庸才。
電影世界 大俠已死
二人除是同學，更是生意夥伴，早期喬靖夫的小說都是由袁建滔幫手出版的。說到能否把武俠小說重回大銀幕，袁建滔答得快狠準：「機會好微。」
袁：初初佢話想寫武俠小說，我想阻止，因為武俠小說好難寫，寫得好難過登天，要諗人哋已經寫過乜，點樣同其他人唔同，所有細節位都要考慮得好細緻。
喬：不過當時我真係好想寫，我由細到大無嘢叻，係作文算OK少少，武俠小說睇得多，又受到日本漫畫家井上雄彥嗰本《俠客行》影響，加加埋埋變成一股寫作原動力。我同自己講，一係唔寫，一寫就要同其他人唔同，你都畀咗唔少意見我吖，例如練功同決鬥之別，《武道狂之詩》有齊呢啲元素。
記：即係乜呢？
袁：哈哈，即係話一個武者平日練功好勤力，無錯係身懷絕技，但到生死對決未必用得着，切磋練功同真正命懸一線，每個武者嘅力量都會有分別，呢點好少小說家注意到，一話決鬥就武功強者勝，我睇就未必嘞。
喬：識你咁耐都無變，最鍾意唱反調。
記：袁建滔，你會唔會將喬靖夫嘅武俠小說拍成電影？
袁：無錢根本無得諗，古裝戲服、刀劍道具、場地配套全都係錢！呢個年頭仲有能力拍武俠片嘅香港導演，可能只得陳嘉上。
喬：新一輩作家未成熟，重拍經典又Out，所以好難開拍電影，有的話我一定捧場，最好重拍《笑傲江湖》，金庸筆下咁多角色，我最鍾意令狐沖，學成獨孤九劍一幕好精采。
袁：情節入晒腦，學校圖書館乜書都唔齊，奇就奇在金庸、古龍、倪匡一本不漏，有乜辦法唔中晒毒？
喬：我睇古龍小說比較多，佢走偏鋒奔放率性，金庸係講故事能手，武俠小說格式由佢約定俗成，講武俠小說王道正中，一定係佢。
武道狂熱 魔杖傍身
立志寫武俠小說的喬靖夫，曾立志做警察為民除害。他好運，考尾二沒被踢出校，還考上大學，確如小說情節般充滿戲劇性，想不到讀文科的他，竟是個空手道黑帶的武道狂。
袁：我呢亭由頭到尾都讀文科嘅文弱書生，武俠小說會睇，但完全無諗過學功夫，正一睇得唔打得。記得大學要寫一篇關於武術嘅文章，膽粗粗臨老學空手道，諗住親身感受格鬥經驗，點知一拳就俾人KO，爆晒缸。
喬：第一堂就要打，唔係嘛？
袁：真係o架，早知係咁，你教我好過，就算唔教空手道，都可以教我甚麼魔杖，有武器傍身點都好啲。
記：乜魔杖？HarryPorter？
喬：有種武術叫菲律賓魔杖，用一支棍做武器搏擊，香港人比較少學，我自己玩咗兩三年，仲跟過師傅去菲律賓比賽，當時未滿師，結果只得一個──敗走。
袁：佢唔止識空手道同魔杖，全球格鬥比賽佢都有留意。
喬：我呢啲叫尚武不尚戰，留意多啲先有寫作靈感，睇多啲格鬥，靈感自然會湧現，好似日本舉行嘅「PrideFC」綜合格鬥賽，可以用齊拳打腳踢肘膝摔投，自由度非常高，全球性各方高手林立，好過癮。
袁：全球性？咁多人參加，打成個月都未完啦。
喬：所以佢哋嘅宣傳口號係「六十億份之一」，暗示啲乜唔使解釋啦，用呢個方式表達天下無敵，一看難忘，勁啩？
記：有無諗過成為新一代天下無敵武俠小說家？
喬：無！靠出書養活自己已經係奢望，莫講話金庸、古龍接班人，打我鍾意嘅武術，寫我鍾意嘅武俠小說，咁嘅生活已經好滿足。
後記
喬靖夫說話毫不拖泥帶水，談朋友情義，恍如現代俠客，深信寫得出好的武俠小說，必有俠客心腸。下一個金庸、古龍是誰我不知道，但作為武俠小說迷，在這個氾濫愛情的世界中，依然有熱血武俠味濃的文字殘存於世，已是不幸中大幸，謝謝你，喬大俠。
熱血武道狂……
以茶代酒，細說往日校園情懷，尤其說到替老師改花名，更笑不攏嘴。
凉亭論劍，二人扮武林高手，不過交不到戲，動作表情生硬。
執書論武，袁建滔手執《武俠世界》，打趣說不如試試投稿，看看有否回音。
喬靖夫作品
《武道狂之詩》，講述流浪武者荊裂與少年劍士燕橫被武當陷害，武當、峨嵋、青城等正派變邪派，俠客恩怨情仇盡在文字間，正價$68。
《殺禪》，早期作品，黑暗味道甚濃，散發復仇沉鬱味道，正價$68。
袁建滔作品
日本版《麥兜菠蘿油王子》，春田花花Boxset附送屎撈人，賣一萬五千日圓。
韓國版《麥兜菠蘿油王子》，附送砌圖，精美程度比香港版本高十倍。
