近排敏妮幫個朋友做financialplan，敏妮唔係做保險，亦都冇賣基金，純粹業餘性質畀啲意見，理應冇乜壓力。不過咁諗就錯晒，因為幫人做financialplan，壓力非常大，除非人哋唔信、唔用你個plan，否則照住嚟做，而你又計錯數，衰啲講，隨時搞到人哋臨老唔過得世。
按通脹壽命推算
其實，financialplan牽涉好多嘢，但最多人關心嘅都係退休問題，事關人老咗，競爭力自然低，到時冇嚿錢傍身，都唔知伸手問邊個幫你。
就好似白滑肌膚最忌紫外線一樣，退休兩個最大嘅敵人，一個係通脹，另外一個係條命有幾長，如果條命比預算嘅長，之前預備嘅退休金就會唔夠用。Financialplanner就係根據呢兩樣unknown嘅嘢，好似玄學家用紫微斗數推算一生咁，推算究竟要為退休生活預備幾多錢。
講得係推算，仲話埋畀你聽係unknown，咁就梗係靠估。最保險嘅方法就梗係預鬆啲，結果就衍生第二個問題，預幾鬆？敏妮當然知道，預得越鬆越好，不過除非個個都係超人李嘉誠，預幾鬆都得，問題係正因為手頭唔係咁鬆動，先想預早籌謀。
唔知同香港人習慣即食文化有冇關係，好多金融機構都預早整定啲excel表畀旗下嘅financialplanner，方便佢哋將客人嘅資料塞入去，run個分析結果出嚟，再喺產品list度，搵啱用嘅產品sell畀個客。個個客都有唔同背景、唔同需要，點可以一本通書睇到老。敏妮認識一位教財務嘅教授，經常提醒佢嘅學生，幫人做financialplan係一門藝術，進退之間要講求平衡。
溫敏妮
http://wanmanli.com/blogs/