花幾百蚊送玫瑰示愛，女人覺得浪漫，男人認為浪費。送菊花又如何？唔係拜山那種，而是來自意大利，睇得又食得的菊科植物──雅枝竹，三月當造，質感爽腍帶果仁香，高纖低卡，美女Queenie都話：「同我示愛，送一紮雅枝竹就夠特別！」觀音兵們，收到未？
記者：吳允冲
攝影：梁細權、王文忠
菜王剝皮只食一半
雅枝竹不是竹，名字是由意大利文artichoke直譯而來，又稱朝鮮薊，是菊科類植物的花蕾，春天三月及秋天九月未開花時採摘，為之最好時候。品種繁多，以最普遍的Mammole為例，大小如一個橙，但可食用的只有花芯及莖，剝開表皮只有一半可食。雅枝竹高纖又低卡路里，多吃可排毒兼降膽固醇，是歐洲「蔬菜之王」。
Mammole最啱釀焗
平日Queenie（陳莉敏）周圍飛，去美國必定買幾個雅枝竹返港：「香港好少有得賣，價錢又貴，我喺美國帶返嚟新鮮又平，拎嚟撈沙律、煮意粉，調味好簡單，加saltandpepper就好好味。」雅枝竹帶淡淡的甘香，質感爽爽腍腍，不知道還以為是菇的一種，意大利人多是烚熟後做沙律。DiVino大廚就創了幾種新食法，「意大利到處都有出產雅枝竹，品種有大有細，今次我整沙律就用SpinosoSardo，貪佢薄身又腍；煮意粉要用花瓣大的Romaneso；紫色的Mammole產量最多，又大又多汁，釀焗最啱。」
食得又睇得
大廚未講完，Queenie已急不及待試食，「四個菜之中我最鍾意沙律，味道好有層次，口感夠豐富；海膽意粉又係好精采，海膽入口溶化變成醬汁，鮮到不得了，食晒沙律同意粉就感受到兩種不同口味的雅枝竹。」食得多，Queenie對煮都好有研究，「中式食法可能更啱中國人口味，雅枝竹入面可包飯做糯米雞，或爆沙茶醬、點日式芝麻醬又得。如果食唔晒，挖空中間放蠟燭做裝飾都好靚……」
*Queenie推介*
雅枝竹海膽扁意粉$195
自家製意粉形狀不一更有咬口，雅枝竹同海鮮是絕配，海膽放在意粉上，熱力令鮮味都發揮出來。
Queenie試食：「意粉煙韌、雅枝竹好有咬口，連海膽食加好多分！海膽好似牛油咁溶化，aftertaste甘甘哋，好creamy。」見佢食唔停口，就知幾好食！
雅枝竹薄片伴黑松露菌嫩菠菜沙律$138
只用雅枝竹花芯，大廚話要切得薄，先做到crunchy口感，加埋黑松露、芝士，傳統中變出新意。
Queenie試食：「如果雅枝竹係男主角，巴馬臣芝士就係女主角，係成碟沙律嘅靈魂！生食雅枝竹質感似菠蘿，但無乜味，靠芝士味搭夠，菠菜可中和鹹味。」
香烘雅枝竹及意大利煙肉$108
雅枝竹做底，上面放攪碎了的雅枝竹、芝士、煙肉等再焗，好考功夫。食一啖，有兩重口感。
Queenie試食：「雅枝竹煮得好腍，有crunchy有smooth，最好食就係面頭，焗得好脆，似台灣筒仔米糕，又似芝士味蘿蔔糕。」
香烘Mammole雅枝竹釀鮮肉腸及白菌$128
雅枝竹烚熟後除去花芯，釀入鮮肉腸、蘑菇、蒜茸再焗，是大廚自創的招牌菜。
Queenie試食：「我鍾意個賣相，食到好多香料味，個底咬落似油燜笋絲，香腸味蓋過雅枝竹本身，味道十足五香豆腐同獅子頭！」
DiVino（21678883）
中環雲咸街73號地下
炸原個雅枝竹勁酥脆
雅枝竹是地中海特產，中東的猶太人早已識得食。Sabatini大廚Luca就以猶太人的傳統食譜炮製雅枝竹，最特別是炸原個mammole雅枝竹，更可以磨成茸，甚至煮湯，食法多變。除了散叫，更有tastingmenu，四道菜包括大蝦雅枝竹野莓醋汁、雅枝竹茄汁長通粉、白酒煮魚配鮮蜆雅枝竹，定價$538，比以往平易近人。雅枝竹推廣期只到4月頭，要食要趁早！
炸雅枝竹配帕爾馬火腿$188
原個雅枝竹炸兩次後外層酥脆又惹味，帕爾馬火腿略鹹，最好配以白酒中和鹹味。
雅枝竹湯伴脆豬頰肉$128
一口有淡淡雅枝竹清香，aftertaste滲出薄荷味，帶出雅枝竹甘香，是猶太人的傳統煮法。
胭脂魚雅枝竹意粉$210
自家製意粉幼如弦線，胭脂魚由意大利新鮮運到，魚味突出，爽口的雅枝竹增加口感。
地中海蝦配意式雲吞雅枝竹汁$225
雲吞包着mascarpone芝士，醬汁由雅枝竹打茸而成，面頭放上地中海蝦，矜貴又鮮味。
Sabatini（27332000）
尖沙嘴麼地道69號帝苑酒店3樓