煲呔話要專注搞好經濟，政改等非優先要做嘅事一於攤凍嚟做，社民連有樣學樣打蛇隨棍上，指金融海嘯肆虐，麻雀館、桑拿浴室、夜總會等聲色犬馬行業生意首當其衝，若政府如期6月底終止豁免禁煙範圍法例，7月起全港娛樂場所一律全面禁煙，呢類夜店勢掀執笠潮，又添失業大軍。
促延長豁免禁煙多兩年
陳偉業表示個零月後提出法案，要求將豁免期由本年6月底延長多兩年，呢類娛樂場所可以押後至2011年7月1日先開始全面禁煙，佢噚晚同夜店業界代表開會，據知佢哋決定稍後開記者會，公佈失業者可能數以萬計，同時搵埋麻雀館、桑拿浴室同夜總會員工講述經營苦況，希望政府畀條生路，仲會參加星期日反加煙稅遊行。
香港政黨好為市民健康着想，要其他政黨支持上述建議好難，陳偉業話唔理得咁多，「如果議員要漠視業界生死存亡，呢個要由佢哋自己決定。」佢又話做過研究，顯示加煙稅只有短期打擊吸煙效果，政府唔收酒稅卻針對煙民，擺明階級歧視。