名牌消費市場叫救命，潮媽徐濠縈卻大無畏向夢想進發，今個星期和拍檔逆市在銅鑼灣開設時裝selectshop，在歐洲精選揀手中價時裝，變身港版MariaLuisa。
陳奕迅老婆徐濠縈是城中潮人代表，熱愛時裝的她，最近有消息指她將在銅鑼灣開設樓上時裝店。徐濠縈昨日接受電話訪問時，直認新舖LigerStore會在今個星期開幕，主打歐洲時裝。
舖名有段古
問到徐濠縈為何揀在逆市開舖，她說：「大家都應該估到呢個係我夢想啦，呢個係我要實踐嘅工作，其實一年來我都有鋪路，好似同啲時裝品牌合作、去睇騷、做fashioninterview、參與少少設計工作咁，但我想低調咁進行。想我哋呢間selectstore，啲人唔係嚟買明星嘢，而係想大家可share我哋嘅品味、眼光。」她謂法國時裝教母MariaLuisa、法國型店Colette都是她欣賞的品味店舖。
徐濠縈又指過去一年和好友何志恩（JohannaHo）合作，令她在設計方面獲益不少，Ligerstore也會引入Johanna服裝。至於為何以Liger（獅虎獸）命名？她說：「其實我嘅partner以前喺D-mop做，我地臭味相投，都好鍾意衫。大家都係屬虎，其中一個嘅月亮星座係獅子座，大家又都係好鍾意話事，有啲leader才能，所以揀咗呢個名。」
主攻中價貨
面對金融海嘯，不怕影響生意？徐濠縈說：「半年前我去入貨，嗰時都有少少金融風暴，唔係咁嚴重，家我哋間舖都唔係話要發到好大嚟做，係間細舖，唔係賣好luxury嘅貨，你唔會搵到幾十萬嘅嘢，係由幾百蚊，到萬幾蚊咁，中價為主。」
採訪：DebbieLum