人大政協兩會散band，不過餘波未了，京、港政壇唔少人仍在細味領導人講話，揣摩「聖旨」微言大義，國家副主席習近平叫港區人大為香港出謀獻計，鬧出疑似違反《基本法》風波，搞到中聯辦同港府官員都要幫忙撲火補鑊。
習副指示港區人大出謀獻策後，又傳出中聯辦副主任黎桂康同港府有協議畀政協參政議政，民主派即時出招要求港府解釋，北京是否想另起爐灶，所謂高度自治係咪好似八萬五咁，唔講等於不存在。有官員同八方講，領導人講嘢又畀民主派入到位生事，搞到佢哋又要出嚟解釋，真係多得領導人唔少。
叫煲呔分餅仔要公平
其實習副無風起浪，講錯嘢辣着火頭都唔係第一次，舊年7月訪港時忽然發表「三權合作論」，指行政、立法、司法要互相理解、支持，令法律界嘩然，因為香港素來奉行三權分立互相制衡，有新中國特色、服從黨領導嘅司法制度，對香港人真係天方夜譚，事後北京「護法」、特區官員都要出嚟解畫降溫，難怪港府官員家聽到習副講話就怕。
對於習副最新指示，各界解讀言人人殊，親中圈子一名老牌愛國人士同八方分析，習副呼籲港區人大為特區出謀獻策，似乎唔係針對人大，而係衝着煲呔而來。據呢位老愛國稱，金融海嘯後特區政府推出多項救市措施，更煞有介事成立經機會，然而對人大政協卻好似視而不見，因此佢認為習副其實係要提醒煲呔，日後分餅仔時唔好側埋一邊。
老愛國上述分析是否言之成理，毋須八方判斷，歷史遲早會有答案，不過巧合地煲呔噚日委任港區人大雷添良為特區出謀獻計，下月起接替鄭海泉做首長級薪常會主席，任期兩年。老愛國講開又講，指出近年每屆兩會前，都有人議論港澳辦主任廖暉會否退休，由於佢係煲呔「靠山」，因此其去留直接影響煲呔官運，習副點名叫大家挺曾，是否意味廖主任已經壓唔住場呢？一定要領導人開金口，先可以遏止下邊班人打小報告呢？京城政事複雜，呢位老愛國坦言暫時睇唔透。
mailto:[email protected]