全世界有無數咁多中國人天主教徒，梵蒂岡官方網頁卻一直冇中文版，教廷新聞辦噚日公佈，稍後梵蒂岡網頁會提供中文版。現時教廷網頁有意大利、英、法、西班牙、德國、葡萄牙同拉丁文等語言，中文係第八種語文。
聯合國承認一個中國，台灣冇份，所以聯合國網頁只有簡體中文版；教廷承認台灣，網頁有繁體中文版，但為免順得哥情失嫂意，亦要方便大陸信徒，所以兼備簡體字版，神對世人，十分博愛。發言人話有咗中文版網頁，全世界互聯網用家都可以透過中文得知教宗嘅訊息，好偉大。教廷中文版網頁應該喺今個月19號正式出街，據講陳日君樞機現時身在梵蒂岡，可能係睇吓有乜幫到手。