中環在線:今年復出做執董 大劉仔趕搵奶粉錢? - 李華華

中環在線:今年復出做執董 大劉仔趕搵奶粉錢? - 李華華

華人置業(127)噚日舉行業績記者會,竟然由一位非執行董事主持,無他嘅,皆因呢位非執董就係主席劉鑾雄(大劉)乖仔劉鳴煒。佢舊年10月底話要抽多啲時間陪太太Wendy生仔,突然辭咗執董職務,家太太已經生咗對龍鳳胎,所以佢透露今年會復出,做番執董咁話。

係咪升職要等公佈

唔知係咪因為做咗老竇,平日陪對仔女玩得多,劉鳴煒噚日笑容多咗好多,兜口兜面問佢做乜身為非執董,即係唔多理日常業務o架啦,都坐喺度主持業績記者會?佢不單冇黑面,反而笑住答:「做非執董唔代表唔可以主持記者會。」佢又主動預告,今年可能做番執董,又再落手落腳做生意,至於會唔會升職,就要等公佈至知。
佢仲呻咗兩句,話湊仔辛苦,「舊年轉做非執董,都係為咗做Daddy,最近都冇覺好瞓!」咁又係,聽講佢太太舊年11月25日生咗對龍鳳胎,的確幾踢腳o架,唔知係咪咁,佢都要快啲復出搵奶粉錢呢?
不過咁,雖然佢已經笑多咗,但都係保持一貫作風,私事唔多提,華華想多問兩句一對龍鳳胎嘅近況,劉鳴煒就耍手擰頭,揚長而去。

李華華
mailto:[email protected]