一朝天子一朝臣，車仔喺摩連奴同史高拉利時代，食葡撻食到滯，荷蘭籍新領隊軒迪克2月上台即轉口味，周日公開話葡萄牙國腳迪高有傷，今季要復出好難。嘩！唔鍾意食都唔使掟落垃圾桶啩！
迪高收「咧」軒帥冇所謂
車仔周日1:0贏曼城上次席，馬會奪標賠率由13倍熱至10倍，壓倒利記成次熱。不過領隊軒迪克賽後竟話半場傷出嘅迪高「短期好難康復，今季要『托弗』先可復出，我抱懷疑態度。」迪高近兩個月一直受腿筋傷困擾，今仗係近一個月首次正選，可惜賽後竟被公開棄用。
同一場波，71分鐘膝傷被換出嘅杜奧巴，軒迪克態度就好得多：「問題不大，我覺得佢好想留低，而且勤力練習，應該好快復出，可能聽日或後日就ok!」我求大俠真係懷疑軒迪克係華陀再世，竟然憑肉眼就判斷到幾時康復！不過，歸根究柢都係口味唔同，親疏有別啫。
我求大俠對某快餐店嘅葡撻頗有好感，不過最近澳門拒絕港人入境後，已第一時間杯葛。小氣？呢啲叫用行動抗議！同樣，軒迪克2月上台後建立自己嘅車仔，亦好易理解。因為荷蘭全能足球講紀律同整體，葡萄牙同巴西球員有唔少都懶散，軒迪克「杯葛」葡撻絕對有理！
剩保辛華仲有運行
講開車仔葡撻現狀，保羅費拉拿受傷康復中，固然係毫無反擊之力；1月由國米來投嘅哥利斯馬，喺史高拉利走後亦被投閒置散；卡維奴最近復出狀態存疑，軒迪克亦肯定依賴阿歷士洛里高；唯一仲熱辣辣令人流口水嘅係右閘保辛華，不過原因都係冇更好人選啫。咪話我求大俠嚇澳門佬，唔係，係葡國佬先啱。軒迪克下季係咪繼續教都好，呢4件葡撻都肯定冇運行，趁早搵定球會落班喇！