小龍女陳玉蓮早排同幾個朋友去咗四川地震災區做義工，出錢買物資畀災民，又同朋友自己揸車由廣州去到北川、都江堰以及綿陽等災區做探訪，一做就做咗兩個幾月。
蓮妹早幾日話：「我哋去啲好窮嘅地方，搵啲真係有需要而同我哋有緣份嘅小朋友嚟助養，供佢哋讀書同生活，如果個小朋友有演戲天份，我都可以幫佢入娛樂圈o架。」
災民未收250蚊
講到今次有乜深刻體驗，蓮妹話：「北川有個校長個太太同個女喺地震嗰陣死咗，但佢仍要帶成班學生去到綿陽，真係好感動。另外，有啲災民以為我哋係政府官員圍住我哋，原來地震之後政府話每人派250蚊（人民幣）畀佢哋，但到家都未收到錢。」
曾同蓮妹拍過拖嘅周潤發，最近亦搞咗個攝影展為災民籌款，蓮妹笑笑口：「如果佢請我，我會去o架！我好贊成每個人利用自己嘅才能去籌款，有錢出錢，有力出力。」欣唔欣賞發哥咁做？蓮妹就咁講：「不嬲都欣賞佢o架啦，佢對人好好，係真心對每一個人，好似以前電視台班幕後仲有同佢聯絡，發哥每年都會同佢哋食一次飯。」