澳門一日遊最好做乜？噚日順利入境嘅一班泛民人士就真係不枉此行，又食又拎又請願，行程豐富不在話下，沿途又有便衣保護，回程時個個一袋二袋，滿載而歸。其中最大嘅意外收穫，係向來生人勿近嘅澳門特首辦，竟然破天荒畀佢哋喺正門拉banner兼影相，相信都係前無古人，後亦未必有來者。來回船飛三百零蚊就「反」盡澳門，抵！
吳靄儀唔使用絕招
話說近30個泛民中人噚日未出發、先緊張。攞住英國護照嘅公民黨吳靄儀帶埋呢個秘密武器過關，以防用身份證過關一旦被拒時，試吓出動英女皇照唔照得住？點知最終佢都順利入境，秘密武器可以收埋。
由於泛民講明拒絕幫襯唔歡迎「攪屎棍」嘅賭王，改搭彤叔嘅新渡輪，大伙兒浩浩蕩蕩咁喺尖沙嘴上船。唔少人話驚新渡輪「拋」，高達打定底，上船前啪咗幾粒暈浪丸，仲話要同記者分享，但其實暈浪丸應該喺上船前一個鐘頭食先有效，衞生服務界李國麟話高達咁啪丸法分分鐘會作嘔，叫佢坐定定唔好郁至真。
去到澳門，雖然泛民大部份人順利入境，但旅途都有波折。話說佢哋要喺當地租車周圍去時，唔少司機都拒絕做佢哋生意，相信同政治壓力有關，幾番唇舌先租到架校巴。佢哋第一個景點唔係去大三巴或者觀音像，而係拉張banner操去澳門特首辦請願，要求撤銷入境黑名單。
澳人禁區VIP式示威
其實澳門特首辦一向係平民禁地，「澳門長毛」利建潤話佢哋次次去請願，都俾人帶去後門進行，邊似得泛民咁可以光明正大喺正門叫口號，所以泛民今次去到澳門其實已經算係獲得VIP招待。既然咁難得，唔知第時港人過大海玩兩手之前，會唔會去澳門特首辦影張相試吓運氣先？
做完正經嘢，梗係要食餐好，澳門出名多嘢食，泛民亦去咗歷史悠久嘅沙利文餐廳歎正宗葡菜。卿姐同張文光更加興奮莫名，即時叫咗澳門啤酒賀一賀呢個歷史時刻。醫完肚大家自由活動，何秀蘭同涂謹申去咗文化中心，又買咗唔少手信，計落呢次澳門遊真係超值。
mailto:[email protected]