八方識得一啲今年畢業嘅大學生，佢哋都大嘆生不逢時，遇上聽講話係百年一遇嘅金融海嘯，咁嘅市道，擔心畢業變失業。噚日星期日，社民連搞咗個抗議鬍鬚曾財政預算案踐踏大學生尊嚴嘅遊行，現場所見真係人頭湧湧，社民連報稱有成300人參加，大部份係學生，警方就冇統計到人數。
有參加者話，早排鬍鬚曾同年輕人扮對話，有學生建議佢同特首及一眾司局長帶頭減人工，鬍鬚曾一句話幫補唔大就即時拒絕，但轉頭佢提出大學畢業生實習計劃，資助4,000個畢業生去私人機構實習，每人月入只得4,000蚊。佢哋話，咁樣變相要大學生做廉價臨時工，只係推遲失業率急升嘅緩兵之計，膠到爆。