08年一堆o靚模紅翻天，唔需要靠天橋或者FashionBrand的賞識，閒來影吓報紙雜誌的Model仔亦可飛上枝頭變鳳凰，半隻腳踩入娛樂圈。除咗早期跑出的Angelababy、JaniceMan和近日上位的Kama，後起之秀仲有周秀娜Chrissie和諸葛梓岐Marie，成名路上唔靠黐、唔靠攝位，只憑四個字：無心插柳。
記者：葉雪芯
鳴謝：Chrissie＠Jamcast、Marie＠Calcarrie's
周秀娜Chrissie：
$400跳升月賺10萬
提起Chrissie，好多人會即時想起其32D魔鬼身材和「A貨樂基兒」稱謂，她不介意憑此成名，更坦承：「無所謂，身材是我的優勢，唔會為此而驕傲亦唔會感到不開心，始終是天生的。至於被人稱為翻版黎明嫂就更加不介意，我都好想有佢咁靚。」今年23歲的她，憑02年漫畫節GameGirl比賽奪亞軍入行，08年成o靚模界新寵，拍電影又拍廣告，行Show出Event，搶盡風頭，單在去年暑假一個月已賺到10萬元酬勞。談到入行經過，她說完全無心插柳：「當年仲讀緊書，一直都有做Part-time搵錢，有一日在銅鑼灣Sogo門口等朋友，遇到星探派卡片畀我，我收埋咗好耐；後來想搵多一個Part-timeJob，就諗起呢啲卡片，經攝影師朋友介紹下簽咗ModelAgency。當時只係當一個賺零用錢的工作，無諗過一直做到家，更加無諗過會做埋Artist。」當年的工作為報紙雜誌拍攝居多，由$400一單Job跳升至現在過萬蚊一場Show錢，模特兒工作最大引誘除了名、還有利。不過Chrissie就奉勸各位師妹要放低Fantasy：「入行前一定會覺得新鮮好玩，不過Model工作最大缺點是收入被動又不穩定、競爭大，而且要受指指點點的壓力，無心理準備都幾辛苦。」
諸葛梓岐Marie：
無目標最緊要好玩
有人做Model為搵錢，但Marie踏入o靚模界只係當玩。今年24歲的Marie，屋企勁有米，家住千呎豪宅，初入行無人知其身世，混血模樣個個以為係日本妹，但其實是諸葛亮第63代後人，靠一個好立克廣告成名。唔為搵錢又唔係要名，入行原來係為好玩，她說：「去年經一個Auntie介紹之下入行，當時無諗太多，只是Auntie同我講，叫我去試試當玩，當作是一個人生的成長經歷。」Marie現時以拍美容和化妝品廣告為主，最近更在電影《保持愛你》中客串，她坦言：「一直認為模特兒就是要行FashionShow、拍一些很美麗的照片為工作，可以試不同的衣服造型，很多變化。但其實我對名利的追求看得不是太重，價錢是其次，最緊要是可以畀我嘗試很多不同的造型、不同的變化。」不為名利，短期內暫時未有太大的目標，不過Marie就話希望做好現時的Model工作，至於踏入娛樂圈就隨遇而安，只要唔好有太多負面新聞就得！
解構o靚模文化
才子王貽興：
o靚模紅得起的原因好簡單啫，因為可以近身囉！傳統的名模只係行天橋，畀人感覺高不可攀，只可遠觀、不可追求，就連識都難，大家都係睇報紙見到佢哋就算。但一班o靚模部份出身Gameshow或者做Model仔幫龍友私影，就好似普通人一樣，感覺親切好多，同人群不知幾接近，男仔可以幻想追求，女仔又可以幻想做佢哋嘅翻版，加埋傳媒吹捧，人氣就係咁嚟喇！
浸會大學社會學系講師邵家臻：
香港受了日本的幼齒文化影響，成班o靚模都唔夠25歲，人人都鍾意Baby。大家都已經覺得做模特兒不需要高『身兆』、成熟、有女人味，好似Barbie咁實在太完美了，模特兒開始轉向低齡化發展，越低B、越甩轆就越可愛，化妝、衣着通通都跟足日本妹，其實這類o靚模文化，都係受着東洋風所影響。
o靚模FanClub：Baby人氣第一
第一位：Angelababy
Angelababy在Yahoo!焦點人物人氣榜上逗留三百幾日，在該榜中留名最耐。
JM出鏡率下跌，Angelababy（楊穎）即獨當一面，FanClub成員達五萬六千多人。
第二位：JaniceMan
JaniceMan在Yahoo!演藝新力軍人氣榜排第二位，上榜日數竟達一年有多！
JaniceMan（文詠珊）因模特兒合約問題未確定是否轉戰娛圈，但Fans依然死忠，約四萬九千人。
第三位：Kama
Kama（羅凱珊）近日轉戰日本行騷，Fans人數仍在飆升中，約有二千七百人。
第四位：Chrissie
Chrissie（周秀娜）論知名度仍屬師妹級，暫有二百多人組團支持。
