家陣全城最熱門話題首選滙控（005），已經不止一次俾Mr.B揶揄，「敏妮，俾你寫過嘅股票，冇一隻唔跌，你都係唔好寫股票喇，寫其他嘢啦！」
本來想駁嘴話，喺呢個時勢，講邊隻股票都有風險，滙控跌都入敏妮數，真抬舉。不過，事實上，今日嘅滙控即使喺一段時間之後、風浪過後會再返高峯，但已經今非昔比，再難同20年前，正值盛年嘅滙控同日而語。
透過期權接貨
「家有一老，如有一寶」，敏妮當滙控係久經歷練嘅長者，所以portfolio點都有啲睇吓門口。不過，敏妮仲年輕，起碼仲有幾十年要捱，所以係時候搵番隻屬於未來20年嘅「滙控」、一隻可以揸20年嘅股票。經Mr.B「提醒」，敏妮唔提會買邊隻股票，但一位已為人父，又精於投資股票嘅朋友就畀咗敏妮一個好好嘅入市策略。
透過沽出認沽期權，喺心儀嘅價位接貨，未到價就收期權金當收息。朋友向敏妮提出呢個建議，係因為知道敏妮慣咗月供股票，個個月都沽出認沽期權，到價就接貨，有定期儲蓄嘅好處，由於整手接貨，所以冇月供股票碎股嘅問題，使費亦都少啲。朋友知敏妮一向唔大使，唔使用月供股票呢一招迫自己儲錢。
當然大前提係要預咗接貨之後，你心儀嘅價位唔係低位，即係接貨之後，隻股繼續跌。仲有要記住，期權係槓桿買賣，千祈要計好有冇本事接貨。
溫敏妮
http://wanmanli.com/blogs/