曼聯球星基斯坦奴朗拿度（C朗）一向被認為態度囂張，原來個阿媽仲犀利，十足野蠻「C」奶。邊個女仔嫁入C7家，日日洗面都唔使用水o架啦，最弊係C朗連揀女友都聽晒阿媽話，嫁唔嫁得過自己諗下啦！
C朗言論得罪英女
C朗縱橫情場短短數年，戰績彪炳嘗過各國佳麗，最近接受電視訪問竟然作個大總結：「葡萄牙女人最得！西班牙、巴西、東歐亦係賣飛佛！」此言一出得罪晒全英靚女，於是英女進行反擊：「我哋有Style！」仲話：「男人都鍾意自己阿媽嗰隻類型嘅女友！」明寸C媽不堪入目。
英國《世界新聞報》都加入反C朗兩母子嘅行列，仲圖文並茂寫C媽上周六去奧脫福捧個仔場，佢嗰身「CR7」牌子打扮（見圖），比曼聯大敗1:4更加得人驚！其實，C朗同明星兼英女代表珍瑪拍拖，當時C媽已經話珍瑪博出位，唔承認兩人情侶關係。所以，C朗咁反英女全因阿媽啫！
唯一英女友被狂抦
不過，我求大俠都要替佢母子講番句公道話，英國球星另一半有邊個入得廚房，出得廳堂呢？見親報唔係行街掃貨，就係夜店happy！C媽一個島上婦女，睇唔慣英女行為一啲都唔奇。何況，葡萄牙人鍾意健康膚色，英女一年冇幾多日太陽曬，C朗母子睇唔上眼好奇咩？
而且，自從C爸去世後，C媽更加睇緊啲個仔。之前就代C朗出頭，話自己個仔唔係花心大蘿蔔，佢話：「佢淨係帶過兩個女友同我見面，一個係妮莉達，一個係羅梅羅。只要我個仔真係鍾意對方，肯定會帶畀我見！」C媽咁緊張C朗，未來C嫂日子肯定唔好過，英女應該鬆一口氣先啱啦！
不過話時話，英女被C媽彈到一文不值，港女亦被批評吱吱喳喳、貪名牌兼臭脾氣，唔通呢啲都係前宗主國英國嘅遺毒？