傳媒記者雖然薪酬低（相對於好多行業而言），但每年都有大量生力軍加入，可見香港年青人滿懷理想，想話做記者服務社會，揭露報導社會不平事，暴露社會陰暗一面，佢哋多數做得幾年就向現實低頭，轉做公關/營銷/廣告去也。但未轉行之前，仍然係對記者工作充滿熱誠嘅。
年青報紙記者G近日對左丁山講：「港台製作嘅『想一想中國』系列，講中國改革開放三十年之人和事，屬紀錄片性質，真係好好睇喎，特別係程翔與王丹嗰兩集，更加精彩，如果參加國際比賽，有攞獎資格。點解港台紀錄片咁有水準呢吓？」左丁山其實知其一不知其二，嗰兩個特輯未睇過，但既然記者G問到，只好想當然，回答佢話：「香港電台最高負責人係廣播處長黃華麒，黃生以前拍《獅子山下》，出晒名，可能佢會對啲港台電視監製、導演，傳授武功絕招呢！」記者G半信半疑，對左丁山話：「黃處長發功？信你一半啫，《獅子山下》係幾十年前咯喎，out唔out啲呀，現在有微型高清攝錄機，嗰陣係八米厘電影喎。」左丁山聞言，不禁失笑。記者G又幾心水清，知道一啲陳年舊事，唔知係唔係佢爸媽講嘅呢，因為記者G講過佢爸爸好鍾意高魯泉、陳振華，阿媽就話周聰靚仔斯文，仙杜拉唱歌好聽。可惜香港唔係美國，人哋七十八歲嘅奇連伊士活仍然光芒四射，創意十足，香港嘅胡楓依然畀無綫要佢表演跳查查！
正是江山代有才人出，一代新人勝舊人，二十世紀七十年代嘅導演教二十一世紀嘅導演點樣運用高清攝錄機、電腦構造、電腦動畫效果，確實不可想像，如奇連伊士活者，係極之罕見嘅電影人，我哋千祈唔好自認與佢同級，阻住地球轉。與大公關講起，佢深以為然，原來佢亦有睇到「想一想中國」系列，讚不絕口，認為黃處長上任果然有料到，佢好想請佢吩咐下屬拍一套「六四二十年」嘅紀錄片，為香港學立下典範。香港學？好深噃，唔明。大公關話：「嗱，如果港台啲編導唔敢拍六四，而黃處長下令拍，咁就好合乎洪清田所講之香港學精神，出入於古今中外思想之間，顯現人文精神胸襟與官僚系統優勢之大融合嘞！」聽見都暈暈哋，不如叫洪清田編劇。