全球矚目嘅G20峯會4月2號會喺倫敦召開，大家期望會議可以搵到穩定全球金融危機嘅合作措施，但渣打銀行亞洲總經濟師關家明就叫大家唔好有太大期望，事關上次G20會議，各國領導最具爭議嘅問題竟然係爭排位影靚相！
不過，相對G7、G8由攬住喊嗰班國家組成，佢話G20無疑係處理今次危機最適合嘅國際權威組織，至於今次討論嘅焦點，應該包括金融保護主義。點解咁講，話說有家美國投資銀行本來請咗個員工，但未返工已被裁走，因為呢間投行獲政府注資拯救，條件之一係要請本國人，而呢名員工唔係美國人。
市場炒賣閒錢漸減
關家明又預期，今年金融市場冇舊年咁波動，事關有閒錢嗰班人就算贏咗第一浸，都會喺第二浸輸番落去，無他嘅，市場炒賣閒錢畢竟越嚟越少嘛！