經濟唔好，搭飛機嘅人少咗，機艙免稅品嘅銷情按道理自然差啲，但港龍話因為內地航線多，乘客多數係內地人，今年頭兩個月嘅免稅品銷售額依然理想，而且佢哋位乘務長馮典威仲喺22間航空公司中脫穎而出，奪得「全球最佳機艙推銷員」。
入行8年嘅馮典威今次擊敗42個來自不同航空公司嘅同行，過程唔簡單。佢話，比賽前各人先參加幾日交流會同講座，分享機艙推銷技巧，比賽時仲要做兩份考免稅品知識試卷，同寫份廣播稿，然後再模擬即場向乘客推銷。
搞gag推銷潤唇膏
架機模擬去北京，一男一女扮外國乘客。馮典威當時咁樣做成生意，「我問頭先一餐好食嗎？打開話題後再觀察二人關係同喜好，知佢哋剛結婚，即刻話北京天氣乾燥，新婚成日錫錫好需要潤唇膏，引得佢哋大笑。」佢相信用幽默、親切同多聆聽嘅方法推銷，係成功得到評審青睞嘅主要原因。
同馮典威一齊參賽嘅空姐甄倬箖同林家寶，就喺創作產品環節晉身決賽。其中甄倬箖提議賣mp3鬧鐘，等長途機乘客可以喺耳筒聽到個人鬧鐘響，都幾有創意。