長毛一早預咗鏵哥唔歡迎佢入境，所以過唔到關就即刻飛的去九龍城賈炳達道公園，諗住喺《城市論壇》現身說法，但唔知係咪澳門政府有心玩佢，10點15分扣留佢，等到成11點先肯放佢去搭船，最終佢到達公園時，論壇已曲終人散。
不過好戲在後頭，因為班維園阿伯知道長毛趕緊嚟，個個都磨爛席唔走，長毛一到就衝上前圍住佢鬧。長毛亦唔執輸，以一敵十舌戰阿伯，其間有阿伯使出一招「輕撫你的臉」，蝕底咗嘅長毛惟有搭吓人哋膊頭攞番少少着數，罵戰越演越烈，最終勞煩警方調停。
講番論壇進行期間，有個阿伯忽然大鬧講者陳偉業，又想向電視台記者動粗；有現場觀眾忍唔住衝前理論時混亂到有人瞓低，睇嚟下次港台都要加人手維持秩序。