高官果然最樂意帶人遊花園，星期六唔使返工，都要搵機會遊吓花園過癮。煲呔曾噚日帶60個攝影愛好者同師生去佢屋企，即係禮賓府影沙龍，眾人喺煲呔帶領下遊遍宴會廳同花園，欣賞萬紫千紅嘅杜鵑花。
香港龍友眾多，煲呔係其中之一，佢話自己迷上影相多年，攝影心得係要發揮創意，多留意同發掘身邊有趣事物。八方見佢噚日拎住部專業級相機，同一大班龍友喺禮賓府四處獵影，而且領隊兼導遊一腳踢，介紹禮賓府內種種花草樹木，又話其實平時禮賓府冇咁多靚花，有客到先擺多幾棵出嚟。呢個名為「首影‧禮賓府」活動，由政府青少年網站 http://Youth.gov.hk舉辦，學生作品下月初會喺網站公開。