劉華拍過嘅愛情喜劇，可能手指加腳趾都數唔完，但講到又賤又抵死，點都要提吓20年前嘅《精裝追女仔》系列！今個禮拜新返《游龍戲鳳》DVD/VCD，雖然無王晶、馮淬帆同陳百祥，但雙劉配（劉華搭劉偉強）加埋初涉足電影界嘅何韻詩，原來都甚具睇頭；仲有全程遊澳門、拍夜景，就算成日過大海，都未必知道澳門原來係咁靚！
記者：陳國輝
嫁？定唔嫁？
曾經歷三次婚姻失敗嘅鑽石王老五（劉德華），有次嚟到澳門傾生意，邂逅跳舞女郎米蘭（舒淇），一見鍾情下窮追不捨，從此將她由草根階層帶入華衣金鑽嘅上流社會。不過，兩人始終嚟自唔同世界，直至談婚論嫁當日，劉華突然間拎一份條款苛刻嘅「婚前協議書」，要求舒淇簽署，令二人關係面臨重大考驗。
爛賭仔追舞孃
喜劇都分好多種！《游》屬於打溫情牌兼帶啲幽默感嗰隻，加埋大堆死橋追女大法，感覺同《精》真係有異曲同工嘅爆笑能力！劉華貴為億萬富豪及賭場酒店CEO，卻裝成一個爛賭仔，走入草根認識另一個世界；點知就咁俾佢遇上唔貪圖富貴、做人有原則，而且深受街坊疼錫嘅跳舞女郎，簡單啲講，咪即係老翻灰姑娘囉！脫離現實唔重要，問題係睇完齣戲感覺幾Warm，如果陪埋另一半齊齊欣賞，感覺會更Sweet。
電工男玩純情
講到戲內最搞鬼嘅角色，竟然唔係劉華同舒淇，而係內地演員張涵予。咪睇佢一臉鬚根兼一身古銅色肌膚，查實佢品性善良兼為人怕羞，更終日埋頭苦幹，維修酒店電路，不過，當佢發現「目標」之後，就立刻TakeAction，走到電視台勇敢地向「滅絕師太」（何韻詩）表白愛意，睇落真係幾似國產電車男o架！至於另一名失戀男（林嘉華），佢因為愛上一名已婚女性，因而有所顧慮，究竟呢三個追女故事最後發展成點，咁要買碟睇喇！
睇靚景欠Blu-ray
港碟Bonus，例牌唔及西片咁豐富，《游》亦唔例外，除首批送1套8款精美劇照外，Bonus基本只有預告片同花絮。新碟今次只推出DVD及VCD兩個版本，而因為戲內出現大量澳門靚景，例如呢期好Hit影婚紗相嘅漁人碼頭、新開酒店賭場以及經典大三巴等，如果稍後有機會出埋Blu-ray版，相信以全高清去欣賞拍拖勝地，會睇得更投入。
Profile
片名：《游龍戲鳳》
類型：愛情喜劇
片長：117分鐘
聲道：DolbyDigital5.1、dts5.1
收錄：預告、製作特輯
售價：$42（VCD）/$89（DVD）
*隨首批DVD附送1套8款精美劇照
查詢：MediaAsia（23144288）
