上周末筆者在電視節目上指，港股若失守11763，可能要向下試，結果周一甫開即跌，士佳將目標定於11329，當日收市前上演「勁假」驚魂，滙控（005）在收市競價時段最後三秒被大戶由37元狂質至33元，全城嘩然，連滙控高層都忍唔住出聲，懷疑有對冲基金興風作浪，港交所（388）亦開會決定取消競價時段，當日滙控拖累期指急跌至11325水平，目標即日到達，共平掉過半淡倉，袋袋平安。
先平淡倉吼高再沽
市場情緒經常跟隨市況波動，說來奇怪，就像當日A股受內地貸款數字急增刺激下狂升，上證綜合指數日日陽燭飆升，殺聲震天，連港股投資者亦受到感染，認為港股必定追落後，將跟隨A股急揚，一時之間投資者都磨拳擦掌，躍躍欲試，士佳也要再三思量。但定神一想，內地貸款屬治標唔治本，當時港股積弱，A股已升兩成，再向上空間亦有限，遂膽生毛繼續沽大市。
今次剛好相反，滙控連日下跌，早已大大打擊投資者入市意欲，市場由認為大笨象抵買，到後來三緘其口，更出現股價個位數「預言」，再加上周一收市競價股價急挫，市場情緒悲觀可想而知。到底滙控合理價是多少？筆者不敢胡亂估計，但大藍籌都可以單日急跌24%，連青姐都激心到喊，心淡情緒到了極點。
物極必反，所以短線回升，筆者不以為奇，亦正正解釋筆者仍然看淡，但也要套利的做法。一來免被勝利冲昏頭腦影響判斷，同時要防範市況逆轉，盈利可能見財化水，寧願平淡倉後吼高再沽。
熊三宜作兩手準備
至上周五，大市跟隨美股再升，市場情緒又開始好轉，士佳收到淡友讀者來信話「好驚」，問「點算好？」，筆者常說，熊市三期只宜高沽，不宜追沽，就是怕市況太反覆，而且下跌已深，值博率不夠，一旦市況逆轉，無險可守，所以每逢急跌就需套點利，再用造淡盈利儲點貨。自熊市以來，筆者鮮有沾手股票，但自上周筆風已轉，開始儲優質股，熊三尾適宜兩手準備，不應過份看好或看淡，上周五大市以全日高位收市，港股有再向上試50日線之勢，筆者又再止賺多點淡倉，輕裝上路，吼高些少再沽。
張士佳