兩會勝利舉行順利閉幕，但開會嘅人大前日返港時，卻唔太順利，其中18個更經歷九霄驚魂，乘坐嘅國航班機飛抵香港準備降落時遇到風切變，全機人喺怪風吹襲下嚇餐懵，好彩最終有驚無險安全着陸。有人話今次大步檻過，要多謝民建聯蔡素玉「臨危不亂」，喺機上不斷念經救番大家條命。
航班劇震10分鐘
呢幕《生死時速》飛機版，前日下午北京起飛，原定傍晚6點幾抵港，但飛機降落時，突然唔着陸反而爬升，後來機師宣佈因為未準備好，所以要嘗試第二次降落，點知飛機喺高空盤旋時，突然劇烈震盪，身在機上嘅曹宏威博士話，當時佢準備去洗手間，空姐急急叫佢返位，佢坐低後飛機突然急墜，成架機好似紙鳶咁飄飄吓，之後震盪持續成10分鐘，「震完又再震過。」
飛機震得咁犀利，乘客都心感不妙，有乘客同八方講，見到有個內地婦人驚到嘔，曹博士亦話擔心架飛機會震到散。由於佢坐近安全門位置，見到警告燈亮起更擔心，「如果有乜嘢三衰六旺，我就第一個開門跳出去。」同樣坐近逃生門嘅工聯會黃國健則話震到唔識驚，其他乘客亦鴉雀無聲，機艙氣氛十分緊張。
就喺人人面青青之際，機上一個角落傳出一把女人念經聲音，有乘客話聽到誦經聲，心情頓時祥和，探頭一望，見到蔡素玉正潛心念經，不停重複「喃嘸阿彌陀佛」，對飛機高低跌盪恍如超然物外，一於少理。
脫險後乘客鼓掌
喺高空萬呎經歷一輪大震盪後，飛機終於喺7點半左右安全着陸，執番條命全機人紛紛鼓掌，黃國健更話唔少乘客大嗌：「全靠蔡素玉念經咋！」另一人大何鍾泰稱，聽聞蔡菜子喺機上打坐念經足足45分鐘。
有乘客話畀八方知，蔡菜子脫險後鬆一口氣，話念經果然得救，「好彩我頭先有念經。」原來佢每遇到突發事件，芳心大亂時就會不斷誠心咁念「喃嘸阿彌陀佛」，呢次都唔例外，真係多謝菩薩保佑。八方噚日問蔡菜子心情平復未，佢話飲緊茶，既然個人平安，衰嘢就唔好再提嘞。
mailto:[email protected]