星俠炒股心態近年變化好大，偏愛國企股，對本地藍籌股則大多不屑一顧。若有留意，好多時股市爆發升勢，H股往往一馬當先，本地藍籌股則淪為「追落後」分子。散戶如想炒股有「錢」途，一定要視野擴闊，多啲關心國家政經，才是正路。
最近有單消息，似乎股壇中冇乜人重視，就係菲律賓總統不顧中國反對，日前正式簽署「領海基線法」，將南沙群島部份島礁和黃岩島劃入菲國領土。中方強烈反對兼提出嚴正抗議，有關法案將提交聯合國審議。內地憤青之流呢幾日已在網上喊打喊殺！若聯合國採納菲國此一法案申請，斷估無事發生都幾難。
南沙爭端油股受惠
今次事件與釣魚台問題極似，亦令我想起石油股。南沙群島有無石油我唔知，我只知該領域沿馬六甲海峽一路上，係國內石油入口運輸主要路線之一，極具戰略意義，亦係周邊各國必爭之地。股海最忌不明朗因素，若事件往後被市場「放大」，料對股市構成一定隱憂，但或可令油股受惠。
油價重越45美元以上，中海油（883）昨裂口高開升越50日線，收7.12元，升4%；去年油價長期在60美元以上，市場料中海油08年純利仍錄得增長，待回至7元邊可吼，目標8元，以6.50元止蝕。
方星俠