不少準爹哋都愛為妻子拍下陀着BB時的大肚照，當了4個多月準爹哋的陳慧琳（Kelly）老公Alex，也急不及待買了全新相機，打算為妻子拍大肚照，可惜遭Kelly為免大肚照不慎流出而斷然拒絕，指「呢個世界冇嘢好留念」。
陀B天后陳慧琳昨日繼續穿上三吋高踭鞋配短裙，聯同鍾鎮濤（阿B）及陳偉霆現身機場立體巨幕影館，為由三人配音的3D立體動畫《天煞撞正怪怪獸》宣傳。當Kelly出場時，阿B即細心上前攙扶，反而懷孕4個多月的Kelly毫不在意，健步如飛。
Kelly自言每次出入都獲身邊人細心照顧，她說：「老公緊張，其實唔使咁緊張我，我見大家先着靚靚高踭鞋，平時會換番平底鞋，我着到先着，唔會勉強自己。」又謂昨日是她與BB一起看的首齣卡通片，平日在家媽咪叮囑她要聽古典樂，Kelly笑說：「咁我咪自己唱幾句，但老公叫我唔好嗌傷把聲。」
「呢個世界冇嘢好留念」
計劃產前兩個月才停工的Kelly，笑指待口腫臉腫便不會見人，問到會否拍大肚照留念時，她斷然說：「唔好影，你哋（記者）影仲靚，我出嚟化晒妝畀你哋影仲好。佢（Alex）專登去買咗部新相機，我唔畀佢影，呢個世界冇嘢好留念，唔使啦，佢家咪喺屋企影花草樹木影廳。」至於會否讓老公陪產，Kelly表示留待醫生決定。
此外，阿B昨日剛由上海返港便立即出席活動，他透露下月溫拿會到上海開演唱會，對上一次在內地舉行的上海演唱會已是93年的事。問到譚詠麟是否仍為關楚耀涉藏毒的事失落？阿B說：「大家知乜嘢事，都冇拎出嚟講，但無阻礙工作，希望呢件事早啲結束，佢哋早啲返嚟，都困咗佢哋咁耐，係好重懲罰。」
採訪：馬建華
攝影：黃偉雄