冧女唱歌 解天災

冧女唱歌 解天災

個個月糧尾都會進入絕糧絕水狀態,玩災難Game《絕体絕命都市3》特別投入!今集除地震外,仲加入火燄龍捲等原創天災,兼可4人連線合作逃生。今集媾女元素幾重,啲女角成日問我嘢撩我傾心事!地震喎、仲媾女?應該係話仲使討好你班女?無法無天回歸原始睇你走得去邊!

文:Loving哥

海底隧道的女歌手

今次係《絕》系列首度玩入手提機之作,副題《步向毀壞的街道與少女之歌》;條街爛晒就唔使講,少女之歌更係重點!古仔起始講香坂同牧村兩位男、女主角,過海底隧道時遇到地震被困;逃生途中遇到今集極重要同伴——本条咲,身兼護士及「夢想」音樂家嘅佢,幫主角有病醫病、無病強身就梗o架喇!得閒仲唱吓歌幫你減壓,誓合眾人之力逃出絕體絕命都市。

■隻Game仲惡搞玩換衫,男扮牛仔、女穿女僕服,爽!

■今集新增創意天災「火燄龍捲風」,好睇過煙花!

■去到某啲地方要狂㩒掣,㩒唔切就浸死喇。

■體力同壓力係此消彼長,正是又怕壓力大、又怕腸胃壞!

冷靜與熱情之間

遊戲玩法主要係四圍逃生、順便救吓人,動作就跑跑跳跳考吓反應兼解吓謎咁;主角有條HP加壓力嘅能源,壓力大能源就會變少,幾時壓力大?「企」喺度唔郁就會諗埋一邊,發生餘震唔踎低又會嚇親加大壓力;減壓方法可以係搵張凳歇吓,或者叫本条咲唱首歌你聽。不過咁,之前咪話啲同伴好多問題嘅,你嘅選擇會影響被界定為冷靜、膽小或熱情,唔同性格會影響聽歌加HP嘅多少,所以做人都係少啲得罪人好;遇到天災都要圓滑處事,真悲凉!

■攞獎喊晒口算係咩?地震都帶住個結他,咁先真係鍾意唱歌嘛!

■成日執到唔同工具幫你逃生。

虛擬人物真實Blog

隻Game支援4人連線,Sell合作過關同真實感。今次廠商請嚟日本嘅防災、危機管理專家渡邊實先生監修,所以Game入面嘅逃生手冊並唔係亂吹,喺真實世界都用得着o架!而虛擬歌手本条咲唱嘅歌,係由日本唱作女歌手飯田舞作曲作詞兼主唱,而且廠方仲同本条咲開咗個Blog成日更新;暫時設定為未遇地震嘅普通人生活,估計到推出日臨近,個Blog就會有突破性發展,真嘅一樣!

■執到滅火筒可以救火,但周圍火救得邊度?咁就考你解謎能力喇!

■本条咲個Blog最近一次更新,話無乜特別事早啲瞓,好真實!

網址: http://blog-saki.zettai-zetsumei.com/

Profile

遊戲:《絕体絕命都市3》
類型:動作冒險類
對應機種:PSP
開發商:IREM
遊玩人數:1至4人
推出日期:4月23日

■特典送專用耳筒。