中環人求生必食　爛Gag撈麪

這天下午，兩個中環OL在茶餐廳細聲講大聲笑，「你阿爸嘅阿媽，鬧你阿媽嘅阿爸。（猜一大學名稱*）」「我估唔到！」「後面張枱有答案，你去睇啦。」原來兩人在估的無聊IQ題，都出自筷子記前老闆Gear手筆。茶餐廳主打澳門地道撈麪，除了IQ題，桌上還貼有自創金句，提醒中環打工仔的求生法則，「Positive啲啦同事們！」

記者：吳允冲
攝影：王文忠、梁細權

*IQ題答案：麻省理工

窮人洋葱汁撈粗麪配葡國臘腸、青春魚肉腐皮卷$28連熱飲

■洋葱汁味甜，最啱苦口苦面的一眾蟹民「窮人」吃。

自創金句笑住食

Gear性格搞鬼，滿腦爛gag，「對住姓陳叫阿Paul的同事，勿亂叫英文名PaulChan（諧音破產）！」股市插水，裁員潮浪接浪，行過中環，人人苦口苦面，Gear的笑話諷刺卻正面，「做人要睇化啲，身邊發生咩事都唔使上心。黑口黑面無補於事，我鍾意做笑位，啲客識笑，我都好有成功感。」就連菜名都改得抵死，「『青春魚肉腐皮卷』簡稱咪『春卷』囉，龍鳳檸樂我貪得意改做『大檸樂』，啲客見過癮又跟我一齊叫。」股市跌個個呻窮，他又推出「窮人洋葱汁」：「我哋賣平民食物，誇張啲咪叫『窮人』，改名唔使咁hardsell嘅，唔一定叫『美味洋葱汁』。」筷子記賣的，除了澳門特色食物，還有中環少見的幽默。

■Gear自度爛gag如：AndyFan（晏啲返），你博炒咩！

■茶餐廳術語香港人都很熟悉，遊客覺得很有趣。

「窮人」洋葱汁撈烏冬配炸魚片、青春魚肉腐皮卷、香菇肉片扒$31連熱飲

■魚片炸得香脆，甜甜洋葱汁與彈牙烏冬同吃十分夾。

八卦新聞攝時間

最初Gear只是將八卦雜誌的報道、電視劇情貼在餐枱上，「中午人多，有時食物出得慢啲客會投訴，有啲剪報畀佢哋睇，感覺上時間過得快啲。」沒想到竟大受歡迎。「呢度OL多，佢哋最鍾意睇八卦嘢，好似淫照事件、鹹豬手……呢期hit乜就貼乜。」近期人人關心金融消息，他又將娛樂版換上財經版。連他也想不到，剪報會成為茶餐廳的特色，引起同行跟風。於是他又自創IQ題娛賓，「啲客又同我一齊玩，搵張紙仔寫個答案攝喺枱面，估來估去得啖笑，無聊但過癮。」白領lunchtime來吃麪，都像學生放小息，一齊估起謎語來。

■Gear請了一聾啞人士做廚房，讚他做事專注。

■新聞多多的謝安琪又是中環白領的話題之一。

■本周無記電視劇的劇情，吸引不少OL食飯來消磨時間。

無人蛇王下午茶

三年前澳門熱盛行，Gear與太太去澳門探朋友，發覺撈麪很有特色，遂在威靈頓街開了這間澳門平民食店。但熱潮過後，生意轉差，他走去開凉茶舖賣葛菜水，找來表妹一家接手經營筷子記。表姨丈李先生接手一個月，生意勉強打和。午市生意得以維持，惟獨早餐、下午茶，「海嘯」後生意明顯下跌，「家啲人唔敢蛇王，食完晏就算，少咗人打嚟叫下午茶。」生意下跌，惟有密密做。「急庇利街得一單都送，國金咁遠我都去送，總之遠近送到。」就連派傳單他都親自逐間舖頭去打招呼，如此落力，李先生坦言：「未知生意如何，真係緊張到瞓唔着！」Positive啲啦李老闆！