過到海就係神仙，泛民主派聽日拉大隊過大海，有幾多人會被鏵哥捧為神仙，聽日揭曉。據聞泛民已經制訂對策，應付澳門離奇兼夾五時花六時變嘅入境政策，不過泛民堅拒透露應變方案任何風聲，連團員都要聽日早上喺碼頭開「茶會」先知，以免俾澳門睇穿底牌，妙計不靈就前功盡廢。
不過，八方都索到啲料，應變方案主要針對部份人入到境，部份人入唔到境嘅情況下才會使出，因為全體獲准入境，或者通通被拒都好容易辦。
據知一行人會大致分開「高危」同「低風險」兩批人，團友會各自帶備橫額，只要部份人順利過關，就會拉橫額發圍抗議，喺澳門影張沙龍，聲援被阻嘅人。