周潤發近幾年醉心攝影，只要不用開工，他就會約同愛好影相的影友四處去拍照，幾年來他拍攝的作品超過1,000張，為了與大家分享他的心血結晶，發哥於本月9日至19日與黃貴權醫生合辦一個以香港印象為主題的攝影展，以黑白照片呈現香港的舊時代與現代的歷史和民生。 撰文：陳月媚
在周潤發的上半生，演戲是他最大興趣，但踏入50歲後，他對攝影越來越熱愛，其發燒程度可以令太太陳薈蓮呷醋，埋怨他對住照片的時間還多過人，他為了拍一張照片，可以清晨5時許就爬落床，然後獨自駕車去某個攝影場地擺好位等拍攝一張滿意作品，不過有時天氣欠佳或光不夠好，他就放棄，寧願下次再來。
垂釣練習耐性
發哥這個人的耐性看來不錯，以前他很喜歡泛舟出海釣魚，一個人對住海幾個小時也不會感到悶或無聊，而且有時未必有收穫，影相也是一樣，捕捉鏡頭是需要耐性，發哥日前接受電話訪問說：「影相係好花時間同金錢，因為影相器材同紙唔平，以前要搏命搵錢養家，邊度有時間同閒情去玩攝影，係呢幾年得閒啲，先至有多啲時間影吓相，我比較喜歡選擇大清早同黃昏時間去影相，因為啲陽光比較柔和，而且人又冇咁多。」
享受影友交流
雖然發哥認識一班影友，但每次出外影相，他反而喜歡一個人去，他解釋說：「影相係要集中精神，有人喺隔籬反而會令我分神，所以我鍾意一個人去影相，不過影完相自己返屋企黑房冲完曬相，我就鍾意約啲影友出嚟分享吓，大家各自帶自己作品出嚟研討吓都幾開心呀！影友會嘅世界，佢哋比較單純，大家以相會友，大部份話題都係環繞影相，反而冇娛樂圈咁複雜同八卦，同佢哋相處我會好放鬆，一啲壓力都冇。」
今次發哥與黃醫生一起合辦攝影展，以現今香港景點與懷舊景點作主題，將香港、九龍和新界的新舊面貌展現出來，發哥表示：「香港區我選咗中環嚟影，九龍就係九龍城同石硤尾，新界就係流浮山，喺呢幾個地方，我搵到好多唔錯嘅景點。」
細味人情 蓮香酒家女報販
「蓮香酒家係屬於老香港式嘅中式酒家，嗰十幾級樓梯幾有懷舊氣勢，呢間酒樓正正代表中區嘅懷舊味道！而每次我天濛光嚟到呢間酒樓影相時，見到報紙婆好忙碌咁分報紙，然後將報紙一叠叠放好後，佢就坐低等人嚟買，見佢個樣都未瞓醒幾有趣，咁我咪幫佢影咗兩張相囉！影報紙婆時，我仲攞埋酒樓條樓梯做背景，增添相中嘅懷舊情懷。」
海天一色 大埔海濱公園
「為咗影呢張相，我一共去過大埔海濱公園10次啦！次次去到唔係天色太暗，又或者隻艇唔就，我每次清晨6點揸車嚟到等，有9次都係等到成8、9點都係影唔成走人，最後一次啲光、水流同天色都啱晒啦！所以我就影咗兩張就走人，張相光與影嘅配合，但相曬出嚟後，美中不足之處係隻艇偏側咗喺右邊，如果喺左邊就最完美啦！」
海中漫步 流浮山女魚販
「流浮山係賣魚嘅集散地，同時都係影友嘅攝影熱點，因為每日清晨，呢度會有好多漁船埋岸，係一個唔錯嘅影相景點，幾個月前我去搵景影，結果有朝早7點去到，咁啱落完雨，我見一個阿嬸拉住一架車仔，準備將車仔上嘅一桶桶魚送去魚市場，而路旁又有一排車仔陣，喺水倒影下，張相出嚟效果就好似阿嬸喺海中漫步咁，幾得意。」
緬懷當年 石硤尾舊區
「石硤尾都可以話係九龍區仲保留住好多舊建築嘅舊區，每次我去到呢區就覺得隨處都可以搵到景影相，而呢張相係我作品展入面其中一張我幾喜歡嘅照片，因為張相雖然係最近拍，但完全可以有濃厚懷舊味道，我以聖方濟學校同幾幢舊樓做背景，諗唔到出嚟效果咁有mood，我唔少朋友都話呢張相好代表到舊區嗰一面，唔知讀者又點睇呢？」
黎明靜寂 中環開市前
「呢張相我喺朝早6點幾走上環球廣場天橋上面影嘅，張相環境仲影埋康樂大廈同交易廣場，我將呢度嘅開市前面貌拍咗落嚟，覺得幾有mood，平時呢度人來人往，點會有呢種感覺，而呢啲建築物同線條又可以表現到中環係現代化城市嘅一面，同蓮香酒家嘅懷舊感好唔同。」
老港正傳 九龍城鐘錶匠
「呢位專賣古董錶嘅鐘錶匠喺九龍城開業幾十年，住喺嗰區嘅人冇邊個唔識佢，我都成日幫襯佢修理鐘錶，有次我10點落到佢舖頭，見到陽光透射入嚟照住整緊錶嘅阿伯，成個畫面好有感覺，所以我就即刻攞個相機出嚟影低佢，阿伯好叻呀！佢幾十年辛苦搵番嚟嘅錢就用嚟供個仔去瑞士讀鐘錶，家個仔已經成為一位出色嘅鐘錶巨匠啦！」
香港印象攝影聯展
由康樂及文化事務署資助場租、香港沙龍影友協會與香港攝影學會聯合主辦的「香港印象──黃貴權＋周潤發攝影作品展」於本月9日至19日在香港中央圖書館展覽館展出，黃醫生將展出75張照片，展出66年至75年的攝影作品，發哥就會將2000年與08年的黑白照作品展出，透過作品與大家一起緬懷過去。
