日聯上個禮拜開波，命中廣島三箭作客橫濱水手開[客/客]，至於名古屋鯨魚迎戰大分三神推介[客/和]，點知開[客/主]，差少少就中，故今個禮拜再向日本波埋手。
連埋周中亞冠盃，川崎前鋒喺開季後打咗兩場比賽。雖則佢哋中前場有祖尼奴、鄭大世同中村憲剛等球星撐場，但似乎未係好上力，喺過去兩場入得兩球。呢場對手神戶勝利船上場喺關西打吡輸俾京都不死鳥，但話晒後防有曾經係日本第一後衞嘅宮本恒靖壓陣，而且又有主場之利，睇怕前鋒贏唔得多，細細哋揀個[和/客]同埋贏1:0算數。
紅鑽要大數取5:0
浦和紅鑽喺揭幕日作客衞冕嘅鹿島鹿角遭技術擊倒，今日返主場埼玉2002體育場有成5萬幾、6萬人打氣，開齋冇難度。上場教練芬基排4-4-2，前面由高原直泰拍田中達也，佢哋兩個對住鹿角後防就話冇運行啫，但FC東京條防線鬼咁弱，上場對攻力麻麻嘅新潟天鵝都可失4球，所以紅鑽要數番幾粒唔難，就博個有成50倍嘅5:0。
至於大阪飛腳主場對磐田山葉，前者對辦，特別係新簽前鋒李安度蒙迪拉，但頭尾8日要打3場，體力消耗大，博山葉偷雞半場領先。雖則佢哋上場爆冷以2:6輸俾升班馬山形山神，但前線嘅基仙奴同前田遼一都入到波，半場領先並唔係冇可能o架。
文：青蛙仔