噚晚，華華睇緊周文耀見記者電視直播，突然電話響起：「華華，你知唔知今日獅子銀行請咗青姐茶敍。」「係？等我打畀佢八吓先。」
華：「青姐，大笨象啲茶好唔好飲？係咪霍嘉治親自斟？」
青：「你點知o架？我連老公都未同佢講。」
華：「哈，我中環咁多針。咁霍嘉治講過乜？」
細數百年動盪安然度過
原來滙控（005）執行董事兼滙豐亞太行政總裁霍嘉治同青姐講，好想多謝香港小股民嘅支持，又話其實滙控自18世紀至今，已面對過好多生死存亡嘅危機，不過都冇事。遠嘅唔好講，好似二戰時成間銀行要撤資返倫敦，又好似60年代香港社會動盪，仲有70年代石油危機，80年代中英談判，都一一捱過。
華華聽到呢度，忍唔住問：「咁49年呢？」青：「咁多危機，我點同你講得晒？不過，佢話一路都作風保守。我有問佢，東歐爆發海嘯第二波會點？佢就話對東歐冇乜exposure，同埋自06年起，集團都冇再做英國按揭……」
華：「得喇、得喇。最緊要你有冇問佢為咩請你上去？」
青：「有啲嘢唔使問得咁明嘅。」
同忠實股東代表溝通
華：「畀我就一定會問，係咪因為喺節目入面喊，所以請我上去！如果係嘅話，我間間上市公司都喊，等佢哋請我上去！」
講完呢句，青姐同華華同時大笑。講到尾，「U33事件」後，滙控如要同忠實股東溝通，唔搵青姐，搵邊個？
李華華
mailto:[email protected]