噚晚六合彩三注瓜分近4,000萬元獎金，大家有冇碰吓運氣？中到獎真係好彩，但如果唔記得去攞獎金，就真係唔夠運嘞。立法會民政事務委員會日前接獲市民黎先生求助，要求有關方面放寬領取六合彩獎金時限，由現時60日延長至365日，畀機會失魂魚攞返應得獎金。
點解黎先生有此要求呢？據轉介呢個投訴個案嘅灣仔區議員李碧儀透露，黎先生早前中咗六合彩三獎，獎金幾千蚊，但佢之後去咗美國，唔記得去馬會收錢，返到香港已超出60日內領取獎金時限，眼白白見財化水，梗係想追討啦，可惜有關方面話要依法辦事，愛莫能助。
原來每年有唔少大頭蝦冇領取六合彩獎金，07/08年度有超過一億元獎金冇人認領，民政事務局回覆立法會稱，同馬會傾過，對方認為限時60天領取獎金係恰當安排，但會不時檢討，如果有需要會修訂。根據法例，冇人認領嘅六合彩獎金，會撥入金多寶彩池。