「大」(dai6)、「玩」(wan2)
註：即台語的台灣
如果有幾日假期，好多香港人鍾意過澳門玩吓，方便就腳使費平，隨時出發都得，不過近排澳門政府拉起鐵幕，無緣無故唔畀香港人入境，賭王又口出狂言唔歡迎7.1上街嘅「攪屎棍」……既然咁麻煩，八方建議大家暫時都係少去馬交為妙。
歡迎港議員訪台
睇見港、澳關係緊張，台灣方面反應好快，駐港機構中華旅行社總經理楊家駿日前去信立法會主席曾鈺成，話好歡迎議員隨時訪台，同時詳細介紹申請各種入境簽證程序手續，表現友善熱情，不論黨派，一律中門大開。反觀澳門特首、官員擺出一副嫌棄港人嘴臉，真係睇見就作嘔。
其實自馬英九上場後，香港各政黨都有成員去台灣大玩特玩，連民建聯都唔例外，因為兩岸關係破冰，去台灣不再敏感唔怕政治不正確，其他泛民政黨「攪屎棍」不在話下，社民連毓民更係台灣大好友。今次楊總盛意拳拳，八方認為立法會應該盡快成行，由曾主席組成「議會暴力考察團」，拉大隊去台灣見識吓當地所謂議會暴力文化，睇完後可能諗到好橋對付掃場黨。
立會台灣考察團唔知幾時出發，公民黨秘書長陳家洛噚日卻獲放生入境澳門，佢冇幫襯信德船務，搭新渡輪去澳門，話呢個係消費者權利，唔一定要畀錢姓何嘅賺。陳家洛今次係以學者身份，應亞歐基金會邀請出席一個關於歐洲社會問題嘅學術研討會，議題不涉政治，不過佢都唔放心，怕又俾澳門留難，笑言擔心澳門將亞歐基金會，同程翔案涉及嘅「歐亞基金會」混淆，將佢當做間諜，分分鐘唔係拒絕入境，拉人封艇仲弊！
陳家洛溫馨提示
陳家洛去年12月20日曾被澳門拒絕入境，今次做泛民周日試閘先頭部隊，入境過程大致順利，過關時女關員特別溫馨提示，叫佢離境時要交回出境申報單。佢入境冇乜阻滯，相信港澳唔少人鬆一口氣。陳家洛去到澳門冇耐，就收到SMS，唔係問候佢，而係香港啲學生提醒教授買手信，蛋卷、豬肉乾、杏仁餅都唔拘，可惜佢行程緊湊，開完會趕住走，唔得閒買手信，冇做出與旅客相等行為。
mailto:[email protected]