亨利成日被批評喺巴塞隆拿嘅表現不及阿仙奴時代，呢位法國「大帝」喺歐聯16強次回合，終於搵啱對手發威。唔知亨利係咪對住同鄉法國球隊特別醒神，周三佢梅開二度助球隊主場大炒里昂5:2（兩回合計贏6:3），仲無啦啦創咗一項紀錄，就係取得巴塞歐洲賽史上嘅第700球！
大炒里昂梅開二度
上季加盟巴塞嘅亨利，初段成日話戰術唔啱佢踢，又話唔適合球隊3箭頭嘅踢法，搞到佢入球數字急跌，仲不時傳出佢想返阿仙奴呢個成名地。點知踢踢吓又過咗一年，亨利今季表現脫胎換骨，聯賽加歐聯暫時入咗19球波，直頭吐晒上季烏氣。
歐聯16強首回合，亨利已展現佢專恰同鄉嘅威力，就係憑佢入波作客迫和里昂1:1。到周三次回合，亨利3分鐘內連入兩球，佢入嘅第2球仲係球會歐洲賽史上嘅第700球o忝！人旺自然好多好嘢跟實佢，之後巴塞再由美斯、伊度奧同施度基達建功，5:2重創里昂。雖然里昂試過追近至2:4，但美斯賽後話：「我哋驚都未驚過，佢哋入到兩球確實係有少少驚喜，不過最後依然冇危險咁過關。」
沙維行善捐成百萬
巴塞教練哥迪奧拿就話：「要稱霸歐洲球壇捧走歐聯，就要向其他強豪展示今晚嘅水準；我可以話過大家聽，呢啲就係巴塞隆拿嘅實力！」我求大俠就覺得，相信只有曼聯可以同現時嘅巴塞爭一日之長短；唔知下個禮拜五8強抽籤，巴塞會唔會抽中對曼聯呢？係就球迷有眼福喇！
其實巴塞家陣個勢咁勁，可以話係好人有好報。上季佢哋為咗宣揚和平信息，破天荒咁喺波衫心口印上unicef個logo，做慈善真係不遺餘力。周三歐聯16強次回合賽前，獲選08歐洲國家盃最佳球員嘅巴塞中場沙維，獲大會頒贈一張10萬歐元（約99萬港元）嘅大支票；而沙維已將呢筆款項，全數捐予國際紅十字會，真有善心。