任天堂、世嘉、PCEngine當年稱霸武林，十年前Sony憑PS2獨步天下，現在被XBox與Wii夾擊變成三國鼎立。內戰未完外敵掩至，多元化數碼玩意OnlineGame、手機遊戲等都分散Game迷注意力，要在充滿火藥味的Game界佔一席位，絕招之一是高層現身做代言人，憑古靈精怪造型博傳媒一笑，有笑聲，就代表有收視……
記者：許維雅
攝影：伍慶泉
項明生（James）
筆名Akio，中二由中國移居香港，1989年考入港大文學系主修心理學及哲學，副修日語及德語，畢業後加入富士攝影器材任推廣部副經理，1998年加入SonyComputerEntertainmentHKLtd.，以副總經理身份負責東南亞市場推廣，兼任Sony代言人。
淙流
原名張韋傑，曾於電視台及多間出版社工作，1997年入行，曾加入《Game通訊》、《GameExpress》及《GameWeekly》等遊戲雜誌工作；8年前加入《GameWave》至今，現職《跨傳媒》總監，涉足Game界12年。
James=J 淙流=C 記者=A
第一招 靠藍光頂住
不同年代不同機種各領風騷，Game界武林王者如車輪轉。在談高清講質素的新世紀，遲來的香港正版Wii似乎只是另一條戰線，新一代TVGame界一哥必屬PS3和XBox之爭，未來5年能否繼續雄霸天下？James對PS3的Blu-ray制式投信心一票。
C：如果講佔市場比率，其實係Wii最多人有。
J：但佢又搶唔到我哋市場，Wii市場唔同，似玩具多過似真真正正嘅Game，好適合大班人聯誼一齊玩。Wii出現對成個行業嚟講係好事，有正面作用，開拓傳統Game界打唔開嘅市場。
A：點睇未來五年Game界發展？仍然係PS3同XBox天下？
J：要數遊戲數量，Wii可能比我哋多，不過我哋行Blu-ray制式，好有利PS3壽命，我哋調查過，大部份人都用PS3睇Blu-ray，屋企有部PS3，阿仔自然會買我哋啲碟，上年出Blu-ray碟可能賣得一千幾百隻，家已經萬萬聲，香港人接受能力高，對我哋將來5年都好有利。
C：XBox行緊DVD制式，容量係個問題，玩某啲Game焗住換碟，我預計三年後會出新機，到時轉乜制式好睇將來取向，放棄光碟格式呢個媒體，轉做下載形式都唔出奇。
J：下載怕有翻版問題出現，暫時嚟講，Blu-ray勁在頂到咁耐都仲未有翻版，連我都估唔到，所以遊戲公司先願意幫我哋出碟。
C：其實上網連線遊戲，都可以Check到有無用翻版，不過做唔做嘢又係另外一回事，家上得網打機班Game迷都好少用翻版，同當年差好遠喇。
J：係呀，以前真係有九成人用翻版打PS2，想當年我每星期都要去海關一次，坐足一日認碟，海關落好景一次過狂掃過百隻碟，開機Show個Logo出嚟畀我睇，我一定要答：「係。」證明啲碟係老翻，跟住又不停熄機開機，我就不停講：「係，係，係。」其實我合埋眼都得，但海關就一定要有持牌人確認，因為有原告先可以起訴。
第二招 開拓女仔市場
香港人心急，最好一晚打爆一隻Game，做Game書要不眠不休出攻略，滿足Game迷胃口；做Game更難，怕有任何閃失進退失據。最好辦法當然是開拓市場，把Game界這個大餅弄得大上加大，大家平衡競爭，人人都有多幾口飯吃。
A：競爭大，係Game出完又出主要原因？
C：翻叮！但每次翻叮都會加入新元素，打法同制式唔同，會增加角色。
J：好似荷李活拍大片一樣，齣戲有收視一定開續集，作為一間遊戲機公司，翻出舊Game係穩陣投資，起碼有收視保證。
C：投資一隻新Game有時要幾十億日圓，出隻Game貴過拍套戲，所以好多時都逼住食老本，希望吸納一批新玩家。
J：十幾年前玩翻版嗰班小朋友，到家變成最有消費能力一群，佢哋對舊Game好有情意結，唔玩都會買，就當買番份回憶。
A：打機年齡層面擴大，Game界市場自然倍增？
J：都係，家啲人感覺打機正面咗，以前邊有明星認自己鍾意打機，開頭得兩間小報寫Game，家份份報紙都有。
C：競爭大咗好多，連潮流雜誌、電腦書都要寫Game。
J：家打機文化普及，幾歲小朋友打機叻過你，其實真係要多謝任天堂，一部Wii，開拓到更大年齡層市場、令更多女仔投入打機。記得1998年，成條女人街都播緊《Butterfly》，掀起過跳舞氈熱潮，有舖頭職員同我講，話有女仔想買跳舞氈但無諗過要買遊戲機，佢以為買塊氈返屋企就玩得，哈哈……市場要成熟，真係要吸納新玩家，女仔玩家係個好大潛力嘅市場，我想將PS3塑造成多媒體娛樂中心，上網睇節目、睇碟、打機乜都得，打開家庭客市場，個餅先可以壯大。
第三招 宣傳博出位
競爭大，宣傳要落力，公司高層都要拋頭露面跑出來做代言人，James懶理非議，不怕人笑，繼續扮鬼扮馬Cosplay，並謂：「有人笑我，證明宣傳有效。」立場無比堅定，我真的想割他一刀，看他是否真的流住Sony血。
J：以前啲高級行政人員好低調，近兩三年先開始現身做代言人，藝人太容易出事，你睇吓，呢年啲藝人成日上港聞，但全部都係衰嘢，最怕今日搵佢代言，聽日佢就俾人拉鬼咗。仲有呀，香港人鍾意認人唔記產品，啲人會話：「Eason飲嗰隻呢！」實質Eason代言過兩種飲品，搞到好混淆。家咪好囉，見到我就知我代表Sony，不過講到尾，最重要當然係為咗慳錢啦。
C：無明星代言人，唯一壞處係吸納唔到Fans。
J：我啱啱入行搞宣傳活動，無藝人，淨係擺幾部機俾人試打已經OK，家仲用呢招一定唔掂，下個月宣傳《StreetFighterIV》，我會請藝人一齊試玩，又要搞春麗選舉，又要搞回顧展覽。
C：係呀，我哋做Game書都講究咗好多，以前啲相唔靚、排版差極都無人理。遊戲機都高清啦，我哋啲相都要靚好多，家讀者好有要求。
J：我哋同Game書關係好唇齒相依，希望佢哋可以寫我哋多啲，寫多啲啦！
A：James，你真係中晒Sony毒。
J：哈哈。有次姪仔攞部NDS出嚟玩，我即刻鬧鬼佢：「你同我即刻收埋佢，唔好喺我面前玩。」
A：但扮鬼扮馬喎，咁都唔介意？本身Enjoy？
J：年年Gameshow都要扮，開頭都覺難為情，最記得有年扮周瑜，有個港聞記者走埋嚟訪問，我見佢忍笑忍得好辛苦，我話：「你唔使忍，笑啦。」其實記者笑係好事，佢哋笑即係讀者會笑，大家開心啫，打機都係希望娛樂人，犧牲少少俾人笑都無所謂啦。
宣傳要出位
扮呂布，連記者都忍不住笑，James：「唔怕人笑，最怕你唔笑。
後記
談Game界未來，只得Sony代表James發言而少了XBox總監黃鉅添的份兒，的確失色不少，可惜力邀黃生多次亦不遂，惟有找Game書界的淙流頂上。要強調的是，兩大頭目非大家想像般勢成水火，XBox推卻的因由只是憂慮有關美國總公司Microsoft的合作問題，估不到原來一向作風保守的日本公司，會比美國公司更開放呢。
