噚日太古（019）開業績記者會，台下有位漂亮洋妞，全場專心聽主席白紀圖解答記者提問，佢就係白太Francesca。
聽聞，自從白紀圖06年做咗太古主席後，每次主持太古及國泰航空（293）業績會，白太都會坐喺會場後面，默默支持老公，難怪白主席每次都笑容滿面。
講開又講，白主席擔任太古同國泰主席後，真係天堂與地獄走過一轉。上任冇耐國泰就成功收購港龍，07年大賺70億；國泰同太古股價喺07年底，仲分別高見23及115.1蚊。
一場金融海嘯令形勢逆轉，國泰舊年蝕86億，連累太古盈利下跌兼冇末期息收。股價亦好似肚瀉咁，國泰噚日收7.44、太古收45.75元。兩年間見盡高低，真厲害。