曾幾何時，有「貴族直資」之稱嘅聖保羅男女中學附屬小學一位難求，家長出盡法寶，花盡人力物力想送仔女入名校；今時唔同往日，八方聽聞St.Paul'sCo-ed附小最近公佈招生結果後，其中一組12個學生，竟然有一半人唔要呢個咁矜貴嘅學位，令校方愕然。
金融海嘯累事
香港大把名校，你揀人、人揀你，正常情況下，都有少數學生獲取錄後唔入學，有人可能讀第二間，亦有啲去留學，呢次咁多人noshow，卻係歷年罕見，校方了解後，原來又係金融海嘯累事。呢間貴族小學每年學費48,000蚊，當滙豐每股120幾蚊時，一手已經夠交成年學費有找，好多中產家長都覺得好抵讀，但當滙豐跌到30幾蚊之際，條數就唔係咁計嘞。
既然聖保羅都收我個仔女，即係乖仔乖女天資唔曳啦，報讀其他政府資助傳統名校一樣啫，慳番筆學費，仔女學琴棋書畫等課外活動亦鬆動啲吖！有位冇人要，係咪代表有較多機會執死雞呢？呢層八方唔敢講，因為仲有好多家長畀得起學費。