鄭少秋、郭政鴻、滕麗名、周麗淇同鄧健泓等，噚日喺將軍澳電視廣播城宣傳無綫新劇《桌球天王》。
講到近期熱門話題滙控供股，秋官話仲考慮緊，問佢驚唔驚劇集出街之後又出現「丁蟹效應」，佢話：「本身就跌緊啦，真係賴開就賴，大家都係洩吓憤，家咪可以考慮趁低吸納。」秋官講笑話行出街都冇有怕，問佢到時使唔使請保鑣？佢好堅決話唔使。
嘲郭政鴻魔術手
噚日秋官又笑郭政鴻係魔術手，事後郭政鴻話唔介意，佢話：「戲入面我成日玩魔術，所以當時都有少少怕俾人誤會，不過都係做嘢，總之都過咗去。」周麗淇就話雖然自己冇買股票，但係都唔相信丁蟹效應，佢話儲緊錢買樓嚟收租，即使第時嫁得出，都可以有番自己嘅私己錢。
