一年前，冇人諗到滙控（005）會跌到33蚊，亦冇人估到美國嘅銀行巨擘花旗集團股價會跌穿一蚊美金，唔少粉絲都因為咁忍痛分手，但4個對公司忠心耿耿嘅花旗高層上周就低撈咗花旗，幾日賬面賺220萬美元（約1716萬港銀）。花旗業績連續5季見紅，舊年股價仲大跌95%，華府被迫三度注資拯救，但股價仍無起色，不過就吸引咗4個花旗高層趁機撈底，當中董事Hernandez上周一以平均價1.25美元買入600萬股，點知3日後花旗一度變身毫子股，跌至97美仙。
正當市場擔心花旗會跌到變仙股嘅時候，舵手潘迪特周二突然走出嚟唱好集團前景，話今年頭兩月表現係07年嚟最佳，佢「金口一開」下，花旗即時起死回生，股價兩日彈47%，令呢4個人由蝕變賺。