社民連窮追煲呔喺議事堂「狗噏」事件，立法會秘書處噚日終於有個說法，繙譯及傳譯部主管分析指，煲呔當日並無「狗噏」，而係講咗「一個近似『夠』字陰去聲的字」，同時考慮當時語意同語境後，決定採用「我不想跟人鬥噏辯論」作為會議紀錄，並指用呢個睇法去編製會議過程正式紀錄係較佳選擇。
毓民話事實擺在眼前，證明當日煲呔其實並非好似新聞處咁講，清晰講出「鬥噏」兩字，而係講出一個讀音接近「夠」嘅字。佢又話諗極唔明，點解秘書處可以將讀音gau3嘅「夠」字，理解成讀音dau3嘅「鬥」字，費盡心思，無非都係要為煲呔補鑊，一個字講晒，就係「兜」。