講起近兩年嘅NetBook熱，台灣ASUS功不可沒！最近佢又喺德國CeBIT發佈咗部雙屏Notebook，引來電腦界另一場大地震！呢部DreamPC概念電腦，玩雙芒用途非常廣泛，除有多點觸控外，仲提供識別手勢指令以及手寫功能。舉個例，喺電腦模式下，其中一個屏幕會變成Keyboard，佢仲懂得根據用家手形，自行調校鍵盤尺寸；啓動音樂程式時佢又會化身為鋼琴琴鍵；更抵死係當你打橫揭開個芒，佢會變成本電子書！呢部DreamPC仲未知幾時推出，有興趣不妨瀏覽http://www.wepc.com睇吓。