周二歐聯16強次回合，車路士作客2:2和祖雲達斯，兩回合計贏3:2晉級；勝負關鍵係完上半場前，車仔嗰兩個入波。其中一球被判唔入，好在球證肉眼犯錯「天眼」冇錯，轉個頭「及時雨」艾辛（Essien）就門前執雞入波，都可算係天佑車仔啦！
入波無效車仔寃枉
主隊今仗表現值得一讚，雖然最後一次參戰歐聯嘅尼維特13分鐘傷出，仍憑伊亞昆達19分鐘入波先拔頭籌，兩回合打成1:1，比賽從頭嚟過。到45分鐘，杜奧巴主射罰球，保方白界內撈番個波出嚟，仲示意未過白界，球證亦走漏眼，車仔入波判唔入！
賽後，車仔領隊軒迪克再次呼籲，足球比賽應引入網球賽嘅鷹眼系統，避免再出現寃枉波，「80年代，燕豪芬就同飛利浦喺龍門裝鏡頭，效果不知幾好，唔明點解當權者唔用！」祖記教練雲尼亞里亦附和：「類似建議講過好多次，人眼靠唔住，網球賽都開始用相關科技啦！」不過，足球場冇鷹眼，好彩天有眼……
話說，周三牛一嘅杜奧巴嗰頭食詐糊，艾辛就喺補時階段追平；林柏特遠射省中對方球員，「笠」過保方後中楣彈出，艾辛快一步補射成1:1。雲尼亞里承認呢個入波好攞命，「好遺憾半場被追和，我講過首回合攞唔到作客入波，已經輸咗大半。」