邦民女Kama（羅凱珊）人紅工作多，佢早排應馬來西亞旅遊促進局邀請，去咗浮羅交怡同檳城首府喬治城，做旅遊大使拍特輯。Kama喺當地拍咗四日三夜，仲坐三輪車四圍觀光睇古蹟，又去咗珊瑚島游水，同鬼妹仔一齊拎白麪包餵魚，Kama仲住喺度假村嘆馬來西亞式spa同熱石按摩，成身鬆晒。
唔會避Angelababy
Kama噚日接受電話訪問，仍然難掩興奮心情，佢話：「陽光海灘，好靚好relax，成個trip又有好多嘢食，好開心！」噚日有報道話佢專黐Angelababy谷新聞，又用低價搶job，Kama就話：「未睇報道內容，唔清楚，但係所有嘢都係公司安排，我事前都唔知會同乜嘢人一齊做嘢，我做嘢係靠自己。」佢話唔會刻意避開Angelababy，同場工作亦都唔會尷尬。至於被指低價搶嘢做，Kama話：「一定唔會低價接job，我去完日本返嚟，嗰價仲高過之前一倍，所以一定冇咁嘅事囉。」
