金融海嘯後，全球銀行都閂緊水喉，唔多願意借錢畀中小企，就算政府開聲甚至行動支持，銀行反應仍然冷淡。不過噚日《華夏時報》報道，招商銀行行長馬蔚華一開聲提到支持中小企嘅建議，總理溫家寶都表示特別關注。
馬蔚華喺小組會議上話，銀行要樹立「保經濟就係保銀行、救企業就係救自己」嘅意識，要同中小企建立長期、穩定嘅合作關係，唔係簡單、片面採取停貸、拒貸或壓貸行為。溫總聽完即刻話佢講得好，完全點出金融同經濟嘅關係，仲話除咗要關注大企業嘅困難，要更加關注中小企喺貸款、融資嘅問題。
馬蔚華過往曾出任人民銀行海南省分行行長兼國家外滙管理局海南分局局長，本身又係高級經濟師，唔怪得講嘢特別有說服力。