阿爺關照香港，先後送咗四隻大熊貓畀我哋，為香港人帶嚟唔少歡樂。幾個中西區區議員妙想天開，竟然提議將其中兩隻大熊貓由海洋公園搬到中環，放喺動植物公園飼養！
建議熊貓移居中環
中西區區議會今日將討論呢個問題，其中一個提出建議嘅議員陳財喜同八方講，自從美洲虎小花逝世後，動植物公園餘下猩猩、猴子同埋雀仔，遊客睇到熟口熟面，冇晒吸引力，所以人流量偏低，閒日人煙罕至，真係只見動物不見人。為咗令呢個公園重振雄風，唔好嘥米飯養老鼠，所以幾個區議員提議將其中兩隻大熊貓安安、佳佳，由南區移居中環，希望可以帶番旺個公園。
陳財喜又指家市民想睇大熊貓，要畀百幾二百蚊入場費，門券貴過深圳市野生動物園同台北市立動物園。既然國寶係國家送畀所有香港人嘅禮物，冇理由要畀錢先睇到，交畀康文署轄下公園照顧，市民就可以免費睇大熊貓嘞，相信好多中西區居民都期待大熊貓落戶中環，可以同大熊貓做鄰居，真係諗起都興奮。
搬遷國寶非同小可，北京唔同意都好難做，所以康文署一口拒絕呢個建議，指動植物公園面積有限，唔夠地方興建熊貓館，亦難以提供合適嘅配套設施招呼國寶，所以唔會引入大熊貓。不過康文署強調，其實動植物公園都有唔少稀有動物，包括揚子鱷同侏狨，日後亦會購買合適嘅珍貴動物。
中環冇足夠地方興建熊貓館呢個說法，八方質疑只係推搪藉口，如果北京有令，相信要煲呔搬走，騰空禮賓府變「熊貓宮」都事在必行，故此康文署拒絕大熊貓入住中環，一定另有原因，其中一個，恐怕同經濟大蕭條有關。
股民見「熊」就頭暈
中環向來係猛獸樂園，大鱷、過江龍通街搵食，近排獅子、大笨象freefall更加砸死唔少人，連青姐都嚇到喊。古靈精怪動物橫行中環，搞到血流成河死傷枕藉，令人聞之色變，區議員竟然唔識死，仲想搵兩隻大熊貓嚟中環，唔通仲嫌中環未衰到貼地？況且中環早就已經熊蹤處處，總有一隻喺左近，議員唔係睇唔到呀嘛！
mailto:[email protected]