《戰場之絆》06年尾喺日本推出，嘩！180度屏幕駕駛，超真實！等到上年終於到港，我哋呢啲飲高達奶水大嘅死士，幾廿蚊鋪做炮灰都無計;今個月尾《戰場之絆》推出PSP版！我諗緊坐巴士玩，一邊向前衝，側邊個窗啲景物就向後退，應該幾好Feel！埋站點算？將就吓啦，街機打十舖，夠買隻Game任玩喇。
文：㩒釘華
唔做戰場之絆腳石
街機推出兩年多，香港都係得三個地方有得玩，25蚊開張卡，35蚊一局兩Round，要練成絕技「三連斬+QD射爆」血連環起碼幾嚿。係！無球形屏幕、無控杆腳踏、無晒臨場感，但係呢隻隊伍對戰動作遊戲，其實好考戰術合作，o依家出攜帶版，四百蚊可以用PSP無線連線4揪4（街機可8揪8）都算係咁。以街機版為基礎，地圖機體選擇一樣多，攜帶版仲有任務模式等玩法更多元化，而且就算你無朋友，電腦都會同你組隊玩，仲有大量訓練模式模擬你同高手過招，之前怕醜唔敢喺機舖俾人指指點點、又怕做高手戰場上絆腳石俾人嫌棄嘅，係時候秘密練兵先出公海。
打打打！放死光！
你未玩過？都可以上網睇片，睇吓班o架仔出「三連斬+QD射爆」無限血連環有幾巴閉。未玩過？到底玩咩呢？其實系統有啲似主觀射擊類WarGame，上場前揀定格鬥、近距離、遠距離支援型嘅MS，格鬥型同近距離型就可以出三連斬玩埋身肉搏，而支援型就守住後方，主要射爆敵方嘅據點，再慢慢逐下逐下「奄」啲敵機，配合戰術地形着重協調，幾條友圍埋開拖過癮過「芒亨」。背景係《一年戰爭》，機體都係以陸戰型為主，殺得多、死得少、打爛人哋據點得高分就陞官發財，同朋友對戰種下仇恨根源就係咁簡單。
Profile
遊戲類型：隊伍對戰動作遊戲
對應機種：PSP
開發商：NBGI
遊戲人數：1至16人
推出日期：3月26日
行貨售價：$418
