陳慧琳（Kelly）懷孕4個多月，繼續背心鬆糕鞋示人，堅持以新一代潮媽look亮相，昨日她專程力撐另一位潮媽謝安琪的音樂特輯。Kelly拿起菜刀作狀拍照，嚇得在旁的謝安琪不停叫唔好，她又透露下周會知BB性別，並說：「仔女冇所謂，最緊要係第日唔好蝦我。」
謝安琪昨日在銅鑼灣拍攝音樂特輯《謝安琪玩謝安琪》，邀請了懷孕4個多月的陳慧琳擔任嘉賓，謝安琪即場烹製一味梅菜蒸鯇魚給Kelly品嚐，不過當Kelly知道謝安琪從未試過下廚的時候，即笑說：「希望我個B冇事！」謝安琪即回應說：「哦！可以食嘅，其實一早已經準備好，我會好好照顧Kelly。」
繼續潮着鬆糕鞋
Kelly堅持做新一代潮媽，昨日她穿着鬆糕鞋襯貼身牛仔褲、黑色背心打底，外加一件毛毛背心，拍照時仍然蹦蹦跳，非常活潑，在廚房拍攝期間，Kelly還拿起菜刀作狀拍照，嚇得在旁的謝安琪不停叫「唔好」。懷孕4個多月的Kelly仍然纖瘦，她說：「我已經肥咗8磅，家其實都唔係太好胃口，每日少食多餐，奶奶會成日monitor（監察）我嘅飲食，媽咪爹哋都好緊張，成日驚我食唔飽，不過我都好彩，冇作嘔冇唔舒服，同平時差唔多。」
「大個實窒阿媽」
Kelly又向謝安琪取經，請教她如何兼顧家庭和事業，謝安琪說：「呢個角色都幾辛苦，好難兼顧，做一個現代女性唔易。」Kelly強調自己不會停止工作，她說：「我唔會做全職媽咪，我都好鍾意做嘢，唔做嘢好悶，得閒做吓，唔做嘢同阿仔溝通唔到。」記者隨即追問Kelly肚內BB性別是不是男？她說：「係唔係男，仲未知，下個禮拜應該知。」Kelly表示不會緊張BB的性別，她說：「我冇所謂，最緊要佢第日唔好蝦我，大個咗實會窒阿媽，阿媽好慘o架！」
採訪、攝影：楊潔雯