美股前晚發威，道指勁升5.8巴仙，股民點解咁雀躍？皆因花旗集團話近排有錢賺，不過美國經濟仲有排捱，睇個款都係借消息反彈。
港股唔理咁多，食住美股個勢炒上，恒指嘜上12228開市，但係受制於10日線，即刻掉頭回落，不過滙控（005）再升2.2巴仙收市，撐住個市，恒指最終升236點收市。滙控今日除權，相信股價會繼續波動。
聯想C輪15915：聯想（992）噚日報收1.53元，升4巴仙，股價喺10日線同20日線橫行好耐，噚日起步炒上，升破20日線，成交多咗，睇個勢會試位處1.63元嘅50日線，破位睇1.80元，可以諗吓隻C輪15915，現價34仙，有效槓桿2.3倍，正股升上1.80元，15915可見49.5仙，正股跌穿1.40元，就沽咗隻輪止蝕。
俊樺