咪話我成日窒本地某隊班霸喇！最近抄志雲大師搞咩飯局，冇啲創意。好似曼聯電視台就有個煮食節目《紅魔廚房》，新一集就請領隊費爵爺上嚟，為名宿丹尼士羅煮個豐富晚餐。
我求大俠睇到費Sir一身紅色廚師裝，喺大廚指導下煮餸，之後捧埋啲菜畀丹尼士羅享用，幾warm呀！邊似得志雲大師等，好似畀錢就係大爺咁，嘉賓食一啖，你問一句，真係食咗都背脊骨落啦！
我求大俠聽聞之前艾雲同艾拉都上過個節目，但廚藝點就唔知喇！至於費Sir呢？睇丹尼士羅個燦爛笑容，就知ok啦！起碼唔會講「好有雞味」呢種敷衍說話！
話時話，費Sir教波叻，廚藝又好（斷估好過我求大俠），真係「入得廚房出得球場」嘅典型好先生、好領隊喎！