貪新忘舊，人之常情，就好似只要有新款，就懶理着緊嘅衫褲鞋襪手袋有幾新淨時款，都會厭。今日Audi推出全新3.0版本新偈新車，又一次發揮貪新忘舊本色，新款A63.0新版，款新之餘，仲要係大馬力兼慳油，呢勻絕對貪得合情合理。
記者：梁美甜
攝影：林栢鈞
Model：Venessa（StageModels）
一貪
貪新偈
Audi旗下好多車款都提供幾個級數，最常見莫過於1.8及4.2兩款，就算係擔當北京同香港馬術奧運嘅高級用車A6都一樣，最新推出全新級數3.0版本新偈新車，「點解要揀呢副偈？」係，我都有呢個疑問，但，諗深一層，Audi車除咗以科技為賣點之外，亦着重Effectiveness同埋Sportiveness，車廠點樣達到呢個目標大家未必關心，之但係大家都不期然俾推陳出新嘅車系及車款所吸引，好似Size棄大轉小、引擎亦更細更強！
全新3.0引擎相對於過去3.2或4.2公升引擎而言細得多，「仲有2.0同2.8公升型號喇！」係，出得新偈更有計，科技提升令新偈排氣量較以往細、體積更細，進而令車身都可以縮細以迎合市場細車潮流，新偈性能進一步提升，搭配機械增壓，令3.0公升引擎輸出馬力較2.8公升多出70匹，最高達290匹。最犀利係扭力，輸出最高達420Nm，配合六前速半自動波箱同埋Audi招牌Quattro，以及全新18吋合金軨，起步快，直路加速更快，時速80公里都只係行緊千零轉，入彎指向性高而穩定。勁？未夠，既然設計大宗旨講嘅係效率，呢款引擎最吸引之處係性能高之餘仲好慳油，廠方數據指，比上一代慳最高15％，咁抵唔貪新偈都唔得喇！
再貪
貪型仔
女人邊個唔鍾意靚，靚之餘仲好鬼型就更無敵，A6素來都係豪華房車格，既有印象過於刻板，全新一代引擎提升之餘，亦為車身內外進行改良。好似新式鬼面罩、基本配備嘅LED日間照明燈、尾箱雙線線條、新式7吋彩色顯示屏連MMI多媒體資訊系統、按鈕式電子手掣等，為新車增添跑味及格調，仲有晒時下大家追求嘅性格同味道。
規格
引擎：2,995ccV6機械增壓引擎
馬力：290hp/4,850-6,800rpm
扭力：420Nm/2,500-4,850rpm
傳動：六前速tiptronic加減自動波
售價：$681,000
查詢：AudiHK（25281862）
